A chung berah Sheffield ngamtu Liverpool

Liverpool-in Premier League nomawi chawi an tum tih an thiltih hmangin an lantir leh ta a, Ningani zan khan an mikhual Sheffield United chu 3-1 in an hneh - table chung ber an luah chhunzawm a, Pathianni zana Manchester United lenchilh turin an inpeih.

Reds tan hian Darwin Nunez, Alexis Mac Allister leh Cody Gakpo ten goal khat ṭheuh an khung a, Reds rawlthar duhawm Conor Bradley chuan an lamah tilutin, Sheffield goal khung awmchhun a ni zui.

Ningani zana team pahnih intawng hi an inthlau hle. Liverpool-in hnehna an chan avangin hmahruaitu an ni zui a, Sheffield erawh Premier League table mawngphah luahtu an ni zel thung!

Reds hian match riat khelh la hmabakin, anmahni hnaih bertu Arsenal aiin point hnihin an la sang zawk a, pathumna Manchester City aiin point thumin an sang zawk bawk.

Sheffield erawhin relegation zone chung chiaha awm chin Nottingham Forest an phak lohna chu point 10 a la ni a, season tharah English top flight league-ah an hmel kan hmu zui lo a nih pawhin thil mak a ni lo ang.

Liverpool tan Nunez chuan minute 17-na lekah goal hmahruai a khung a, Sheffield goalkeeper Ivo Grbic ball petchhuah tur chu Uruguayan forward hian lo dang perin, goal-ah a lut zui - Nunez hian tun season inelna hrang hrangah match 44 khelin goal 18 a khung tawh a, assist vawi 14 a nei bawk.

Reds hian inkhel thunun mah se, mak tak maiin goal dang an khung lawk thei lo a, an vanneih zan a ni dawn lo em ni chu aw, tih mai tur a ni - Mohamed Salah chuan vawi hnih ngawt uiawm takin chance a hlah a, Nunez-a'n a tauh goal loh leh Grbic-a'n a dansak te pawh uiawm a tling a, Joe Gomez-a'n hun ṭha nei mah se, Liverpool tan goal a la khung lo tluang zel bawk.

Ryan Gravenberch a vannei lo a, Luis Diaz-a'n a chance neih a chhawr bik lo a, Dominik Szoboszlai pawhin goal khungtu zingah a hming ziah kai tum mah se, a vanneih ṭum a ni bik lo. Minute 58-naah Liverpool an phu zawk a, Gustavo Hamer-a ball tauh chuan Conor Bradley perin, Liverpool lamah a lut.

Mahse, Reds tan a hunah tak Mac Allister a inlar a, penalty box pawn aṭangin kawh pawtin hmahruaina goal a khung - minute 90-naah Gakpo chuan a belhchhah ve leh a, 3-1 in Liverpool an chak.

Liverpool boss Jurgen Klopp chuan, "Kan inkhel thlak danglam turin Macca goal ropui kha kan mamawh a ni. Kan tana player pawimawh, ṭha chungchuang bik a ni a, Liverpool-in ani ang player kan nei thei hi kan lawm hle," a ti a, Argentine midfielder hian a freekick hmangin crossbar a tihper bawk.