Manchester United ngawihtirtu Cole Palmer

Manchester United-in hun pek belh minute kuanaah pawh hma an la hruai a, inkhel a tawp meuh erawh chuan Chelsea an chak. Stamford Bridge-ah Cole Palmer a ropui a, Manchester City aṭanga Blues zawmtu hian Man United ṭantuten 'Man City duh loh' tia an au elna chu hattrick hmangin a chhanglet. Mauricio Pochettino hoten 4-3 in hnehna an chang.

April 4, Ningani zan inkhelah Conor Gallagher hmangin Blues-in minute linaah hma an hruai a, minute 19-naah Palmer-a'n penalty a khung leh bawk. Mahse, Alejandro Garnacho-a'n Moises Caicedo pass sual chu remchangah lain minute 34-naah siphurh a sut ṭhen. Minute nga hnuah Diogo Dalot-a cross chu Bruno Fernandes-a'n a tauh lut leh bawk.

Second half-ah Man United-in hma an hruai zui a, Antony ball vawrhluh nalh zet chu goalkeeper Djordje Petrovic-a'n man hmain Garnacho-a'n a tauh hman a, minute 67-naah Man United-in 3-2 in hma an hruai. Ten Hag-a hote chak turah an inngai.

Mahse, substitute Noni Madueke-a'n Dalot a tlan pel a, Man United defender hian a titlu zui. Referee-in penalty spot a kawk a, penalty pet thiam bik Palmer rawn pen chhuakin Man United goalkeeper Andre Onana-a'n a la dang thei chuang lo.

Inkhel a la tawp mai lo. Chelsea-in corner kick an hmu a, minute 100 leh second 39-naah Palmer hian box chhungah ball changin goal-ah a pet a, United midfielder Scott McTominay a per hnuah a goal-ah a lut.

Man United-in minute 99 leh second 17-na thlenga hma an hruai chungin an chak lo zui a, Premier League record duhawm lo tak an siam. Palmer hian Man United laka hattrick a siam hmangin league-ah goal 16 a khung ta a, Moahmed Salah nen an goal khung zat intlukin Erling Haaland (goal 18) chiah an tluk lo.

Palmer hian tun season-ah penalty vawi riat petin a khung vek a, England tan nikum November aṭang khan khel ṭanin Euro 2024 khel turin Gareth Southgate pawhin a koh ngei rinawm ta hle.

Chelsea boss Poch pawhin Palmer hi top player a nih thu a sawi a, pressure hnuaia a ṭhatna tak lan ṭhin chu a fak. Blues hian Man United an hneh avangin 10-naah an awm a, April 7, Pathianni zan dar 10:00-ah Sheffield United an mikhual ang.