PSG chakna Neymar leh Mbappe

Paris St-Germain chuan Neymar-a hattrick leh Kylian Mbappe a goal hnih hmangin Istanbul Basaksehir 5-1 in an sawp a, French champion hian point 12 hmuin Champions League group H hmahruaitu an ni.

Thawhlehni zan khan Paris khawpuiah team pahnih hi an intawng a, minute 14 bak an khel hman lo. Fourth official Sebastian Coltescu-a'n chi inthliarna rawngkai ṭawngkam a hman avangin khelmual aṭangin player an chuak tau.

Nilaini zan khan an khelh hmabak la neih aṭangin an khel chhunzawm a, PSG tan Neymar leh Mbappe ten a khat mawi tawkin goal an in thun chhawk - mikhual team tana Mehmet Topal goal khungin awmzia a nei phak lo.

Brazilian forward Neymar-a'n goal hnih a khung hnuah PSG lamin penalty an hmu a, Barcelona forward hlui hi a pet tur ni mah se rawlthar Mbappe a kian a, France international hian a goal khatna khung nan a hman bakah a khung belh zui bawk.

PSG coach Thomas Tuchel chuan, "Neymar khan penalty pet thei a ni a, hattrick siam theihna tur chiah a ni bawk. Khatiang huna Kylian hnena ball a pe thei kha a fakawm a, ani khan UCL a goal a khung loh kaltluang chu tihtawp nan a hmang thung.

"Neymar rilru puthmang kha a puitlingin fak a phu, a ṭhianpa Kylian tana penalty chhuih luh a pawimawhna leh a mamawhna kha a hriatthiam pui hle a ni," a ti. Neymar hian PSG a zawm tirh lamah Edinson Cavani nen penalty an lo inchuh tawh a ni.

A naute fak zuiin Tuchel chuan, "Puitling vek an ni tawh, khelmual chhungah eng pawh thleng se thutlukna siam turin ngaihtuahna an hmang thiam. Boruak dang leng vel karah pawh ṭha takin an khel thei," a ti.

Season hmasa khan PSG hian Champions League final an lut a, nomawi inchuhna inkhelah Bayern Munich an ngam lo. Ligue 1 champion hian kuminah an duh ber European football inelna sang bera champion hi an tum mek.