Havertz khelh danah Arteta a lungawi

Premier League season kal laiah Kai Havertz-a'n goal 12 a thawk chhuak tawh, English football inelna sang berah hian season khat chhunga goal a thawhchhuah tam ber ṭum a tawng mek - a chet vel danah Arsenal manager Mikel Arteta a lungawi hle.

Havertz chungchang sawiin Arteta chuan, "Goal nawr kawnga a chet dan hi a lawmawm hle, goal khung leh assist chiah ni loin kan khingpui tlarhnung kan nawr dawna kan chet velnaah a ṭangkai thei takzet.

"Team tan kawng hrang hrangin a thawh hlawk, chung zingah chuan goal venghim tura a chet dan thlengin a tel. Kan tan season a khelh hmasak ber a ni a, a khelhna kan sawn bawk - chuti chunga a chet dan hi a lungawi thlak," tiin a sawi.

Germany international Havertz hi a chang chuan tlarhma laiah khelhtir ṭhin a ni a, a ṭul dana zirin a sirah pawh dah a ni zauh zauh, tlarhma lamah chuan mamawhna laiah chhawr theih a ni, tihna a ni.

Arteta enkawl Arsenal hian Premier League nomawi an beisei mek a, an elpui champion lai Manchester City leh Liverpool te nen an inhnaih hle, match khat result avang lekin an dinhmun a la inthlak kual thei vek.

Man City leh Reds inkhel chungchang zawhna chhangin Arteta chuan, "Theih ni se la chuan an match zawng zawng hi en ka duh, a chhan chu match an khelh apiang hian thil danglam hmuh tur a awm deuh zel.

"Mahse, ka nupui leh fate hian thil tih duh leh châk dang an lo nei ve ṭhin, a bik takin ka fa naupang ber chuan huana infiamte a duh ṭhin, chuvangin kan elpuite inkhel lai en vek duh mah ila a harsa dawn tih ka chiang," a ti.

North London club hian zanin dar 10:00 hian Brighton & Hove Albion an lenchilh dawn, an chak a nih chuan Premier League hmahruaitu an ni lailawk ang.