A tawp thlengin kan bei ang - Pep

Manchester City boss Pep Guardiola chuan Premier League nomawi chawi tura a tawp thleng an beih tur thu a sawi. City hi league table-ah pathumna an ni mek a, hmahruaitu Liverpool chu point thumin an phak lo mek a, an chungah Arsenal an la awm bawk.

A tawi zawnga sawi chuan City tan champion turin chak vek a ṭul a, Liverpool leh Arsenal chetsual chan tel a ṭul bawk. Mahse, coach Pep a la beidawng lo a, an hmaa hna inchhawpte hlen phawt zel a duh.

Pep chuan, "Liverpool leh Arsenal hi keini aia point nga, point ruk, point sariha sang zawk an ni lo a, kan hmabak match-a hnehna kan chan zel chuan champion hre turin season tawp ni thleng nghah a ṭul hial ang.

"A awlsam dawn hauh lo - ka ngaihtuahnaah chuan hei hi thil awm sa a ni. Liverpool leh Arsenal inkhel ka en ve reng a, point an hloh ṭha duh lo lehnghal a, kan tan chuan a harsa dawn khawp mai," a ti.

Mahse, Pep chuan an hna an thawh ve phawt a ṭul thu sawiin, Spanish coach chuan, "A pawimawh ber chu kan hna kan thawh phawt a, a hnua kan inchhir loh hi a ni. Nakinah, 'An tlawm leh ta sia, kha match-ah khan lo chak ila a ṭha tur,' tia kan indawmkun loh nan kan hna kan thawh a ṭul.

"Keini chuan tih theih kan nei tawh lo. Liverpool leh Arsenal kan hmachhawn tawh dawn loh avangin an lakah tihtheih kan nei tawh lo a, keini chuan kan hmabak match-a chak zel mai hi tihtheih kan neih chu a ni," a ti a, beidawng loa an beih zel a ṭul thu a sawi.

Manchester City hian vawiin tlai dar 5:00-ah league match khel turin Crystal Palace an lenchilh dawn a, Thawhlehni zanah Champions League quarterfinal frist leg khel tura Real Madrid an lenchilh zui dawn avangin Pep tan inrem fimkhur a ṭul khawp ang.

Pep chuan, "Ka sawi tawh ang khan, Liverpool leh Arsenal te nena kan inkar hi zau tak a ni lo a, a inhnaih hle. Mahse, an chetsual kan chan tel erawh a ngai thung - an pahnih hian team ṭha tak an ni lehzel bawk si," a ti a, Reds leh Gunners result ngaihven reng chunga season an hman a ṭul.