Goal nen Aguero a lo kir

Sergio Aguero chu hun rei tak chhung hliam vanga a inkhelh theih loh hnuah a dam tawh. Nilaini zan khan Argentine striker hian Marseille lakah goal khung nghalin Manchester City chu 3-0 in a chak pui.

Man City manager Pep Guar-diola chuan a striker chungah rinna a nghat ngam tih a sawi a, tun kar tawpa an hmachhawn tur Manchester United tan erawh chanchin ngaihnawm a ni ve kher lo ang.

Spanish manager Pep-a naute hi Champions Legague group C chung berah an awm, an hnuaiah hian Porto awmin an tlang ve bawk. Andre Villas-Boas enkawl Marseille erawh point thum chauh an neih avangin a mawng berah an awm.

Etihad Stadium a Champions League inkhelah Pep-a'n a player neih ṭhat tam zawk chu hahchawlhna hun a pe, hliam damkawr Aguero pawh bench lamah hun hman hmasak tir a ni.

Tling chiang tawh City leh beisei nei tawh lo Marseille ten an hun ṭha neih an chhawr ṭangkai thei lo, second half-ah Ferran Torres chuan goal hmahruai a khung chauh. Goal an neih hnuah Aguero dah luh a ni zui bawk.

Nathan Ake ball tauh chu keeper Steve Mandanda-a'n lo dang hman mah se a per chu Aguero hmaah a tla, striker tawnhriat nei ṭha hi a hun leh hmunah tak a lo awm chat. Hun tawp dawnah Raheem Sterling khung tur chu Alvaro Gonzalez-a'n anmahni lamah a ti lut bawk.

Tun season chhung atan Aguero-a'n match nga chauh a la khel, hliam vangin a chawl ngun hle. Amaherawhchu Guardiola-a'n a chungah rinna a nghat ngam a, a beisei ang ngeiin chhanna chu pek a ni.

Pep chuan, "Vawi li chauh training a nei hman, minute 25 khelin goal a khung nghal. Goal khung tura pianpui thiamna a neih kha chu a la pangngai reng," a ti. Inrinni zana Manchester Derby atan erawh bul ṭan tur chuan atan a la hma tih a sawi bawk.

UCL group C-ah Man City hian point 16 hmuin a chung berah an awm, English club zingah group match aṭanga point hmu hnem ber record an siam. Tun hmain Arsenal, Tottenham leh Man United te pawhin point 16 hi an hmu tawh - United hian nomawi an chawi zui.