Leeds tana bul ṭan tur a chiang tawh!

Zanin dar 1:30 hian Leeds United chuan Premier League khel turin West Ham an mikhual dawn a, manager Marcelo Bielsa chuan a naute zinga inkhel bul ṭan tur a sawi chiang der tawh.

Nilaini zan khan thuthar thehdarhtute hmaah Bielsa a inlan a, defender Diego Llorente leh Robin Koch te an inhliam avangin Liam Cooper bulah tu nge ding dawn tih an zawt. Argentine manager hian Luke Ayling emaw Kalvin Phillips emaw an nih tur thu a sawi.

Media lamin an zawh belh a, Argentine manager chuan, "Diego aiah Rodrigo Moreno a lut ang, midang Illan Meslier, Stuart Dallas, Ayling, Cooper, Ezgjan Alioski, Phillips, Mateusz Klich, Moreno, Raphinha, Patrick Bamford leh Jack Harrison ten bul an ṭan ang," tiin a khel tur zawng zawng a sawi vek!

Season hmasa Championship champion hian EPL-ah pawh inkhel hmuhnawm an chhawp chhuak a, match 11 an khelh tawh chinah vawi nga an chak a, ṭum nga tlawmin vawi hnih chu an khingpui nen an inhnehtawk.

Leeds hian an match hnuhnung berah Chelsea 3-1 in hneh lo mah se tun ṭumah erawh Elland Road-ah an khel dawn a, chak tura rin zawk an ni ang. Chutihrualin West Ham hi sawi nep theih an ni hauh lo a, Manchester United lakah an hmahruaina humhim thei lo mah se table-a an awmna hian team dinhmun a sawifiah.

Hammers hi pariatnaah an awm a, Leeds hi 14-naah an awmin an inkarah point thum chiah a awm. Moyes-a'n midfielder pahnih Declan Rice leh Tomas Soucek te a hmang thiam a, Czech midfielder Soucek hi 6ft 4in-a sang niin 'The New Fellaini' hming lem an pe hial. Elland Road-ah Moyes-a hoten point hlawhchhuah ngei an tum ang.