Mizo paruk awmna Mohammedan an champion

Mohammedan SC-in match khat khelh hmabak neiin I League-ah a vawi khat nan an champion. Mizo paruk awmna Kolkata club hian champion an nihna nemnghet turin April 6, Inrinni zan khan Shillong Lajong 2-1 in khualmualah an hneh.

Russian coach Andrey Chernyshov kaihhruai Mohammedan hian April 13, Inrinni zan dar 6:00-ah Delhi FC nen league match hnuhnung ber an khel dawn a, hetah hian captain Zodingliana Ralte (Adinga) leh a ṭhianten nomawi an chawi ang.

Kolkata club tan hian Adinga bakah Mizo player David Lalhlansanga, Lalremsanga Fanai, Samuel Lalmuanpuia, Vanlalzuidika leh Lalbiakhlua Jongte te an pawimawh hle.

Champion zan chu

SSA Ground No. 1, Shillong-ah Lajong-in Moahmmedan an mikhual a, Kolkata club-in champion turin point khat chiah an mamawh tawh. Uzbek midfielder Alexis Gomez-a'n halway line pelh hret aṭangin a pet thut a, Lajong keeper Neithovilie Chalieu a pet khum nalh hle.

Minute khatna lekah Mohammedan-in 1-0 in hma an hruai a, mahse Lajong-in minute 15-naah an chhanglet. Brazilian forward Marcos Silva-a'n penalty hlawh chhuakin a kawppui Brazilian tho Douglas Tardin-a'n penalty hi goal-ah a chantir, halftime-ah 1-1 a ni.

Second half-ah bench aṭanga rawn lut Evgeny Kozlov-a'n danglamna a thlen a, Russian winger Kozlov hian ball vawrh luh naran tak chu la lutin box pawn aṭangin minute 62-naah ṭha zetin a pet lut. Chakna goal a ni zui bawk.

Kolkata lawmna

India ram football-ah Kolkata-in hmun pawimawh chang mah se I League-ah an ropui hran lo. Mohammedan champion hma hian Mohun Bagan-in ṭum hnih nomawi an chawi tawh a, a bak an la champion miah lo!

East Bengal pawh ISL an zawm hmain I League-ah an champion thei lo a, Kolkata club lian pathumnaa sawi ṭhin Mohammedan hi a vawi khat nan I League-ah an champion - season thar atan ISL khel turin an tling bawk.

Russian coach Andrey Chernyshov-a'n kum 2024 bul an ṭan ṭhat loh laiin I League champion tura team ṭha ber an nih thu leh an phu thu Vanglaini a hrilh tawh a, a thusawi dikna a lang. Captain Adinga chuan, "Pathian vang chauh a ni a, kan team inlungrualna hi kan chakna hnar a ni," tiin Vanglaini a hrilh.

Mizo panga

Mohammedan captain Adinga hian Shillong Lajong tan pawh captain hna hi a lo chelh tawh a, I League-ah Gokulam Kerala chu ṭum hnih a champion pui tawh. Hei hian Armed Veng defender hi Kolkata club tana a pawimawhzia a sawifiah.

Vairengte tlangval David Lalhlansanga hi Mohammedan zawm fuh ber zinga mi a ni a, a goal khung theih avangin Calcutta Football League-ah hming a chher. I League an ṭan meuh chuan fan-te ngainat a hlawh tawh a, champion theih nan goal li a khung.

Lengpui tlangval Lalremsanga Fanai pawhin goal li tho a khung a, I League-a Rounglass Punjab champion pui tawhtu Zemabawk North forward Samuel Lalmuanpuia'n goal hnih a khungsak bawk.

Lunglei Pukpui tlangval Vanlalzuidika Chhakchhuak hi Chhinga Veng FC leh Electric Veng FC defender ṭhin kha a ni a, Mohammedan tan pawh I League-ah vawi 10 a inlan thei. Lunglei ramthar goalkeeper Lalbiakhlua Jongte hi ISL club Hyderabad tan pawha khel tawh a ni a, Kolkata club-ah back up goalkeeper hna a chelh.