Malsawmkimi tan gold, Joseph tan silver

REC Combined National Level Talent Hunt Programme chu Rohtak, Haryana-ah neih mek a ni a, Mizo tleirawl TC Malsawmkimi chuan 48kg junior girl-ah gold medal a la. Joseph L Buihringpachha chuan 57 kg junior boy-ah silver medal a la bawk.

North Vanlaiphai tleirawl TC Malsawmkimi hi SAI a awm a, Serchhip District Boxing Association-in an sponsor a ni. April 6, Inrinni khan final-ah Malsawmkimi hian Uttarakhand boxer Jaya Bhist chu unanimous decision-in a hneh.

Malsawmkimi hian first round-ah Arunachal Pradesh aiawh Nyasum Bam chu round 3-ah technical knockout-in a hneh a, quarterfinal-ah Delhi boxer Nancy chu unanimous decision-in a hneh a. Final thleng tur hian semifinal-ah Maharashtra boxer Shraddha Khobragade chu unanimous decision-in a hneh leh bawk.

KISCE SYS-a inzirlai Joseph erawh final-ah Haryana boxer lakah split decision-in a vanduai a, silver medal-ah lungawi a ṭul. REC Combined National Level Talent Hunt Programme hi March 30 aṭanga ṭan kha a ni a, April 15, Thawhṭanni thleng neih a ni ang.