Arsenal leh Man City chesual duh lo

Premier League champion lai Manchester City an chak zo chiah a, dinhmun duhawm takah ding hman mah se a hnuah Arsenal chak ve lehin a chung berah an awm - English football inelna sang ber boruak a nung takzet.

Inrinni zan inkhelah Mikel Arteta naute hian Brighton 3-0 in an hneh, nizan khan Manchester United leh Liverpool an inhmachhawn zui; Reds lamin point an hloh chuan a chung berah Gunners an awm zui ang.

Laipui a puak

Arsenal tan Loton Town an hneh ṭuma inlan thei lo Bukayo Saka a lo kir leh tawh a, England international hian a hun ṭha hmasa berah goal khung lo mah se penalty a chhuih lut a, striker Gabriel Jesus tana ball ṭha bik a pek pawh goal atan an chantir teuh hle.

Gunners hian a tir lamah goal khung an harsat, mahse Tariq Lamptey-a'n Jesus a tih tluk avangin penalty a chawi a, hian huan kawng zau takin a hawnsak. Tun hnaia khel ṭha tak mai Kai Havertz chuan Jorginho siamsak hmangin an goal hnihna a khung bawk.

Brighton fans lamin an player hlui Leandro Trossard an auel nasa a, Belgium international hian counter attack aṭangin an goal thumna a khung a, chak nemnghehna a khung hi banpharin a lawm - Brighton lam tan hmuhnawm a ni lo ang.

Arsenal manager Arteta chuan, "Tawnhriat kan ngah zel a, a huhoin thil tam tak kan tih tawhna chuan rahṭha a rawn chhuah. Team tichak thei tur player ten min rawn zawk bawk a, tunah chuan kan kal dan hi a fuh hle a ni," a ti.

Gunners hian April 9, Thawhlehni zanlai hian Champions League quarterfinal first leg khel turin Bayern Munich an mikhual dawn, kar tawpah UCL beisei mektu Aston Villa nen Emirates Stadium-ah bawk an inkhel ang, hna a hautak chho dawn hle.

Haaland leh goal

Goal a khung theih em avangin match khat lek a khung loh pawhin Erling Haaland chanchinin sawi a hlawh mai ṭhin. Manchester City striker ṭha hian Inrinni zan khan Crystal Palace lakah goal a khung leh ta, an mikhualna ramah 4-2 in an chak.

Man City tan tun hnaia khel ṭha bera chhal ngam Phil Foden a inlan lo, mahse Kevin de Bruyne hun a inherchhuak ve thung. Belgian midfielder hian goal hnih a khung bakah Rico Lewis tan a siamsak. Palace tana Jean-Philippe Mateta leh Odsonne Edouard te goal in awmzia a nei lo.

Citizens tana goal 100 khungtu De Bruyne chungchang sawiin Man City manager Pep Guardiola chuan, "Kan club tan hian hun rei tak chhung chu a ṭha berte zinga mi a ni tawh. England rama a inkhelh dan hi a ropui takzet a ni.

"Tun season atan pawh hliam vangin thla nga vel kan chhawr thei lo, hun pawimawh lai taka a lo kir leh hi a lawmawm. Goal khung leh ṭhiante khung tur siamsak hi ngelnghet takin a ti thei reng a ni," tiin a midfielder chu a dahsang thiam hle.

Man City tan EPL nomawi an kawl lai humhim turin an match hmabaka chak vek ringawt a tawk dawn lo, an chunga awm Arsenal leh Reds chetsual an chak a ngai dawn. League match an khelh leh hmain Real Madrid nen UCL quarterfinal an khel leh phawt ang.