Reliance Naupang League a ṭiak ta

Reliance kaihhruainain district pali Aizawl, Champhai, Lunglei leh Kolasib-ah football hmanga naupang inelna Naupang League buatsaih a ni a; Champhai leh Lungleiah khelh tawh zawh tawh niin April 6, Inrinni khan Aizawl leh Kolasib-ah zawh fel leh a ni.

Reliance Young Champs, Mizoram chhung bika technical head Lalrindika chuan, "Aizawl chauh ni loin district hrang hrangah hmasawnna kan hmu. Kumin hi season vawi hnihna a ni a, September thla aṭanga ṭan kan tawp ni thlengin a nung char char. Kum 14 hnuai lam chin hi chuan nu leh pa puihna an mamawh a, naupang chauh ni loa nu leh paten min hlutsak hi kan lawm hle a ni," tiin Vanglaini a hrilh.

Dika hian sawi chhunzawmin, "Football kan inzirtir a, kan lawmna chu khelmual pawna hmasawnna an neih hi a ni. Nu leh pa ṭhahnem takin Naupang League-a an khelh hnuah an faten nungchang mawi an neih phah thu an rawn sawi a, hei hian kei leh ka thawhpuite minti lawm hle," tiin a sawi.

District tinah hian category pali Under 8, Under 10, Under 12 leh Under 14 a awm vek a, Aizawl leh Champhai ah hian team 12 an awm. Lunglei leh Kolasib-ah team pariat ve ve an awm thung.

Champhai hian March 28, Ningani khan an zo a, Lungleiin March 30, Inrinni khan an zo leh bawk. Aizawlah hian team 12 an inel a, chungte chu Beck's Football Academy, Dawrpui Vengthar YMA, Dinthar YMA, Durtlang Grassroot Centre, Hunthar Football Club, Kanan FC, MFA Grassroots 'A', MFA Grassroots 'B', MSSC FA, Neuhof RGSA Grassroots leh Zotlang GFA Team te an ni.