Yamaha MBA Inter club champion Mizoram Police

Yamaha Mizoram Badminton Association Inter-Club Badminton Team Championship 2024 chu Inrinni khan khelh zawh a ni ta a, Mizoram chhunga badminton inelna lian leh ngaihhlut hlawhah hian overall champion chu Mizoram Police Badminton Club an ni.

April 1 aṭanga neih ṭan tournament-ah hian category pakuaah inelna neih niin, category pahnihah Mizoram Police hi an champion kawp thei - an ropui hle.

Ramhlun Indoor Stadium leh Bawngkawn YMA Hall-a neih inelna-ah hian Under 15 Boy's & Girl's Team, Under 19 Boy's & Girl's Team, Men's team, Women's Team, 35+ Men's Team, 45+ Men's Team leh 55+ Men's Team-ah te inel a ni a, club hrang hrang 29 aṭanga team 88 inlanin, player 300 chuang an tel thei a ni.

Mipa inelna

MBA Inter-Club Badminton Team Championship-a inelna ngaihhlut hlawh ber men's team-ah Bawngkawn Badminton Club (BBC) an champion a, final-ah Chanmari Shuttlers Club (CSC) an ngam - team pahnihin player an nei ṭha a, final a 'hot' hle.

First singles-ah Joseph Lalhruaitluanga (BBC) leh C. Lalramzauva (CSC) te intawngin, Ramzauva hi straight set-in a chak a, mahse, Lalrinawma leh Laldintluanga Tlau (BBC) te inkawp chuan Subham Yadav leh Steven Lalhriatpuia (CSC) te ṭangdun hneh ve lehin, 1-1 a ni.

Bawngkawn an phur chho - second singles-ah BBC tana inlan Malsawmsanga (Esha) chuan CSC aiawh Lalramdinthara chu straight set-in a hneh ve leh a, BBC hian 2-1 in hma an hruai zui. Chutih laiin reverse doubles-ah C. Lalramzauva leh Joseph VL Ringngheta, CSC-te ṭangdun chuan Mano Malsawmdawngliana leh Joseph Lalhruaitluanga, BBC-te ṭangdun chu straight set tho in an hneh leh a, 2-2 a ni.

A tawpah Bawngkawn

Mipa team inelnaah deciding match khelh a ngai a, Bawngkawn tan Laldintluanga Tlau a lo pen chhuak a, Chanmari tana a hmaa ding chu Isak Lalmuanawma a ni - shuttler pahnih hi point an innih rual zak zak hnuah, point pawimawh laia che fuh ṭhin Dindina'n straight set-a Isaka hnehin Bawngkawn a champion pui.

Hmeichhe team lamah pawh Chanmari-in final an lut tho a, mahse, an champion zo chuang lo - Saron Badminton Club nen intawngin, hmeichhe lamah Saron Vengin nomawi an chawi. First singles inkhel hmuhnawm takah Ramdinmawii (CSC) chuan Laldingpuii (SBC) chu deciding game-ah a hneh hram.

Mahse, doubles lamah Saron shuttler Laldingpuii leh Abigail Lalṭhazuali te inkawp chu Chanmari aiawh TC Lalṭhazuali leh Lalngaihsangi ten ngam lo zuiin, 1-1 a ni. Deciding match khelh a ngai a, SBC aiawh Abigail chuan Lalngaihsangi (CSC) chu a hneh a, champion nomawi an hlawh chhuak.

Roreltu Police

Inelnaah hian a pumpuia gold la hnem ber Police-in overall champions trophy an hawn. Saron BC chuan category palia final lut chungin gold pakhat chiah an la a, Chanmari chu category pathum final-ah an chak zo lo vek!Mizoram Police erawh final an luhna pahnihah an chak ve ve a, 35+ Men's Team leh 45+ Men's Team-ah te gold an hlawh chhuak a, Men's team-ah bronze an la bawk.

Hetihlai hian junior category lamah Aizawl pawn an che ṭha - U15 Girl's team-ah North Kolasib GSA-in Saron BC hnehin gold an hlap chhuak a, U19 Girl's Team-ah pawh Mamit BC-in Saron BC hnehin, champion nomawi an chawi haw.

U19 Boy's Team inelnaah Serchhip Kawnpui BC-te chuan Badminton Club Republic an hneh a, gold an hawn. U15 Boy's Team huangah Hlimen BC chuan 08 BC Mamit Team an hneh a, Aizawl khawpui chhung aṭanga junior category bikah champion thei awmchhun an ni.