Shuttler ṭha ber Ṭhazuala & Rempuii

Mizoram Badminton Association (MBA) chuan Inrinni khan MBA Awards 2024 a sem chhuak a, Badminton Inn Player of the Season (mipa) atan H. Lalṭhazuala chu thlan niin, hmeichhe player ṭha berah Lalrempuii thlan a ni thung.

Chanmari West rawlthar Ṭhazuala hi season hman zawh takah khan 35th Sub-junior National Championship, Hyderabad-ah Under-17 Boy's singles champion niin, Lucknow-a neih All India National Sub-junior Ranking Badminton Tournament-ah U17 Boy's Singles-ah a champion bawk.

Ṭhazuala hian North East Zone Inter-State Badminton Championship 2023, Arunachal Pradesh-a neihah U19 Boy's singles inelnaah gold medal lain, MBA Official Championship 2023, Senior (Men's singles) leh Junior category (U19 Boy's singles) ah te a champion kawp thei!

Mizo shuttler ṭhangduang hi 30th Smt. Krishna Khaitan Memorial All India Junior Ranking Prize Money Badminton Tournament (Under-19), Panchkula, Chandigarh-a neihah final lut mah se, hliam vangin a khel tluan thei lo thung a, silver-ah lungawi a zir.

Ralte Villa BC player Ṭhazuala hi India aiawha vawi hnih feh chhuakin, Chengdu, China-a Badminton Asia Championship-ah India tan U17-ah inlanin, March 6-10 inkara neih Yonex German Junior, Berlin-a neihah khan men's singles-ah India ai a awh a, February 28 - March 3 inkara Haarlem, Netherlands-a neih Yonex Dutch Junior International 2024-ah khan U19 Men's singles a khel bawk.

Hmeichhe player ṭha bera thlan Rempuii hian season liam taah khan North East Zone Inter-State Badminton Championship-ah U19 Mixed Doubles leh Girl's doubles-ah te gold medal a la a, North East Games 2024, Dimapur-a neih zawh takah Mixed Doubles category-ah Mizoram tan gold a hlawh chhuak bawk.

Tualchhung inelnaah pawh Serchhip nula Rempuii hian MBA Inter DBA Championship 2023-ah Ralte Villa BC Senior Mixed Team chu a champion pui bawk a, player ṭha bera thlante hian pawisa fai leh trophy bakah Sunlight Sports dealer-te aṭangin badminton thuam an dawng bawk.

Serchhip rawlthar Malsawmhlua chu Most Promising Player of the Season (Mipa) atan thlan a ni a, Ralte Villa player Mama hian 2nd Ashwini Gupta Memorial All India Sub-junior Ranking Badminton Tournament 2023, Panchkula, Haryana-a khelhah U15 Boy's doubles-ah gold a la a, All India Sub-junior Ranking Badminton Tournament 2023, Lucknow-a neihah U15 Boy's doubles-ah vek silver a la bawk. MBA Official Championship 2023 (junior)-ah khan U15 Boy's Singles leh Boy's Doubles category-ah te a champion ve ve.

Kum 14 mi, Champhai Vengthlang tleirawl Zoramthari chu hmeichhe player ṭhangduang berah thlan a ni a, season kal ta chhung khan All India Sub-junior National Ranking tournament, Bangalore-a neihah U15 Mixed Doubles-ah bronze a la thei a, Gaudium Sub-junior Open Tournament, Telengana-a neih ah U15 Mixed Doubles-ah a champion bawk. Season kal ta khan training a neihna lama a chet ṭhat avangin Pullela Gopichand Badminton Academy (PGBA)-a awm tura thlan a ni.