Athletic Bilbao-in nomawi an chawi

Copa del Rey final-ah vawi ruk zet an tlawm zawn hnuin Athletic Bilbao an chak ve ta nge nge a, Real Mallorca lakah penalty hmanga hnehna changin, champion nomawi an chawi.

Mallorca hian minute 21-naah Dani Rodriguez hmanga goal hmahruai khungin, rin hlawh zawk Bilbao fan-te an ngawihtir a, mahse, Barcelona boss hlui Ernesto Valverde enkawl Bilbao an chi ai duh lo.

Minute 50-naah Oihan Sancet chuan Bilbao tan si phurh sutna goal a khung a, mahse, team pahnih hian goal dang an khung zui lo - penalty hmanga chak zawk zawn a ni a, a tawpah 4-2 in Bilbao an vannei a, nomawi an chawi.

Barakhaih

Valverde hoin Bilbao-in season duhawm tak an hmang a, league lamah pawh Champions League khelh phak an beisei ngam. Mallorca erawh tla thei dinhmuna ding an ni a, relegation zone an hlatna pawh point ruk chauh a ni.

Mahse, Inrinni zana Copa del Rey final-ah erawh goal khung hmasa zawk an ni a, minute 21-naah corner aṭanga ball kal chu Bilbao lamin an petchhuah theih loh avangin, Rodriguez-a'n goal hmahruai khung nan a hmang.

Copa del Rey final kalkawnga Barcelona leh Atletico Madrid hnehtu Bilbao-in a chhanletna tur an nei lawk lo a, goal dang lut loin chawlhlawk hman zui a ni.

A tawpah Bilbao

Bilbao-in chawlhlawk an hmang ṭha - second half ṭantirah Spain attacking midfielder Sancet chuan a team tan a theihna a pholang a, khel ṭha em em mai Nico Williams-a siamsak chu goal-ah a chantir.

Team pahnihin goal dang an nei thei lo - Williams-a'n chance nei ṭha mah se, a chhawr thei lo a, Mallorca tana Vedat Muriqi ball tauh chu Athletic goalkeeper Julen Agirrezabala chuan ṭha zetin a dansak bawk.

Minute 120 chhung goal dang a luh loh avangin penalty hmanga chak zawk zawn zui a ni a, Bilbao tana pettuten an chhuih luh vek laiin, Mallorca tan Manu Morlanes leh Nemanja Radonjić ten an pet goal ve lo a, 4-2 in Bilbao an chak.