Goal nen Messi a lo kir

Lionel Messi-a inhliam a dam tawh a, nimin zing khan Inter Miami tan inlan leh thei tawhin goal a khung nghal, chakpui nan erawh a tawk zo lo. Inter Miami hi Colorado Rapids nen 2-2 in an inhnehtawk.

Argentina captain hi malpui hliam vangin tun hnaiah match li chhung a inkhel thei lo, a lo kir lehna inkhelah hian ball lir lai chu box hrul aṭangin mawi takin a hlap lut. March 13 hnua a match hmasa ber a nih avangin mipui ngaihven a hlawh hle.

Miami boss Gerard Martino chuan, "Ṭha takin Leo a inkhel thei ve leh thei ta kha a pawimawi lai ber chu a ni. Amah pawhin nuam a ti a, team tan ṭha takin hna pawh a thawk chhunzawm leh ang a, chu chuan result ṭha pawh a keng tel leh ngei ang," a ti.

Miami hian Nilainiah CONCACAF Champions Cup quarter-final khel turin Monterrey an lenchilh ang, an intawn hmasakah Mexican club hi 2-1 in an chak, tunah chuan Messi hoin thawhleh an tum dawn.