NorthEast tan beiseina a la thi lo

Indian Super League-ah playoff hmun ruak pakhat a la awm a, team paliin khelh theih an la beisei vek - NorthEast United pawhin beiseina la neih chhunzawmin, Inrinni zan khan Kerala Blasters chu 2-0 in an hneh. Highlander tan Nestor Albiach leh Jithin MS ten goal khat ve ve an khung a, Freddy Lallawmawma bul ṭan zanah Blasters an tlawm.

Inrinni zan inkhel hmasa zawkah Mohun Bagan chuan 1-0 in Punjab FC an hneh a, Bagan tan Dimitrios Petratos chuan inkhela goal awmchhun a khung - I League champion PFC tan playoff a beisei theih tawh lo. Punjab tan Daniel Lalhlimpuia chu bench aṭangin a lut a, Lalrinliana Hnamte chu Mohun Bagan tan bench aṭangin a lut ve bawk.

Zirtawpni zan khan FC Goa chuan 4-0 in Hyderabad an sawp a, Goan club tan Noah Sadaoui chuan hattrick siamin, Carlos Martinez chuan goal khat a thawh ve bawk - Hyderabad tan Mark Zothanpuia, Lalchhanhima Sailo leh Ramhlunchhunga ten inkhel bul an ṭan a, Aron Vanlalrinchhana leh Jeremy Zohminghlua te bench aṭangin an lut thung.