Bayern Munich an champion dawn lo; Leverkusen tan match khat chak a la ngai

Bundesliga nomawi chu Bayern Munich ta tur chauha siam a ni bik lo, tunah chuan Bavarians hian an league title kawl lai chu Bayer Leverkusen lakah an hloh ngei dawn niin a lang ta, match khat lekah an dinhmun chinfel thei a ni dawn.

Xabi Alonso enkawl Bayer Leverkusen hian Inrinni zan khan Union Berlin 1-0 in an hneh, goal awmchhun hi Florian Wirtz-a'n chawlhlawk hma chiaha penalty aṭanga a khung niin, a zawnin match kua an chak tling ta chiah bawk.

Inkhel dangah champion lai Bayern Munich chu 3-2 in an chak lo. Thomas Tuchel-a naute hian match 28 aṭangin Leverkusen hi point 16 ngawtin an thlau ta, khelh hmabak match paruk an la nei a ni.

Alonso naute hian kar tawpah Werder Bremen an mikhual dawn, an chak a nih chuan midang inkhel result ngaihchan tel ngai miah loin Bundesliga champion an ni ang, anmahni khelmual BayArena-ah ngei mai champion an chak zual khawp ang.

Union Berlin nen an intawn hmain Alonso chuan champion sawi nan a la hma tih a sawi a, engpawh la danglam vek thei a nih thu a sawi bawk. Hnehna an chan hnuah pawh a la ṭawng fimkhur hle a, a naute lakah boruak rit siamsak a duh lo.

Spanish manager Alonso chuan, "Inbuatsaihna kan neih ṭhat ang bawkin tun season kan hman dan pangngaiin kan khel thei. Tunah hian dinhmun ṭha takah kan ding mek a, tun kar tawpah hian ropui taka lawm tur pawh kan nei mai thei.

"Mahse, tun hi a vawrtawp thlen hun a la ni lo, kar laihawlah Europa League khelh tur kan nei," a ti. Ningani zan hian West Ham United nen Europa League quarterfinal first leg an khel hmasa phawt ang.

Inkhel dangah Bayern Munich chuan 2-0 in hmahruai hmasa mah se an hum thei lo. Harry Kane leh Serge Gnabry te goal khung chu Heidenheim lamin Tim Kleindienst-a goal hnih leh Kevin Sessa te goal hmangin an chhanglet a, 3-2 in an lehthal.

Bayern Munich manager Tuchel chu ban tur angin thawm a ri ring hle a, nimin tlai thleng kha chuan an la ban lo. Arsenal nen Champions League an khel zui dawn a, German manager hian a kaihruai tlang ngei ang tih sawi ngam a harsa rih hle.