Laureus Sportsman of the Year Djokovic
Thawhṭan zan khan Germa-ny khawpui Berlin-ah 2016 Laureus World Sports Awards sem a ni a, tennis khawvela rorel mektu Novak Djokovic chuan Sportsman of the Year chawimawina dawngin Serena Williams a langsar bawk.
Johan Cruyff chu Spirit of Sport chawimawina hlan a ni a, goal 500 khung tling hlim Lionel Messi leh Formula 1 legend Niki Lauda te hming a lang tel bawk. Paralympic swimmer Daniel Dias chu nikum IPC Swimming World Championship-a gold medal pasarih ngawt a dawn avangin a vawi thum nan Sportsperson of the Year with a Disability hlan a ni.
Tennis a langsar
Serbian star Djokovic-a'n Sportsman of the Year chawi-mawina hi kum 2015 leh 2012 khan a lo dawng tawh bawk. Djokovic hian nikum khan Grand Slam paliah final lut kim vekin Australian Open, Wimbledon leh US Open-ah a champion a, French Open final-ah a vanduai thung.
Kum 28-a upa Djokovic hian he chawimawina dawng tura chhawp chhuah zing ami infiamna kawng hrang hranga mi langsar tak tak footballer Lionel Messi, sprinter Usain Bolt, Formula One champion Lewis Hamilton, golfer Jordan Spieth leh NBA Most Valuable Player Stephen Curry te a khum a ni.
Djokovic-a coach Boris Becker chuan, "Novak hian kum duhawm tak a hmang leh a, match 88 a khelh aṭangin vawi 82 hnehna a chang thei a, major tournament-ah champion vek lo mah se final a lut kim. Grand Slam bakah nomawi dang pasarih ngawt a chawi thei bawk hi a ropui hle," tiin a sawi.
Grand Slam vawi 11 cham-pion tawh Djokovic chuan tun hnaiah tennis chu match-fixing leh doping vanga hming hliau deuh nia an sawina chhangin, "He infiamna hi a thianghlim lo leh felhlel lai man chhuah fak a awm a nih ngawt loh chuan a hmelhem tihna a ni lo," tiin a sawi ve bawk.
Hmeichhe lama chawimawi-na langsar Sportswoman of the Year chu Serena kutah a vawi thum nan hlan a ni bawk. American star hian nikum khan Australian Open, Wimbledon leh French Open champion nomawi a chawi a, an rama khelh US Open-ah erawh a champion zo lo thung.
Cruyff a la dam
Kum 2006-a Lifetime Achieve-ment Award lo dawng tawhtu Cruyff chu khawvel hmun hrang hranga naupang dinhmun hnuaihnung zawk ten infiamna ṭha an neih ve theih nana a thawhhlawk avangin Spirit of Sport chawimawina hlan a ni. Ajax leh Barcelona legend hi kumin March 24 khan kum 68 mi niin chuap cancer vanga a thih tawh avangin a fapa Jordi Cruyff-a'n award hi a dawn sak.
Laureus World Sports Aca-demy chairman Edwin Moses chuan, "Ani hi chuan infiamna hi hma a sawn theihna tur anih phawt chuan a theihna zawng zawng a hlan ṭhin," tiin Cruyff a dah sang hle.
Barcelona star Messi chu Sportsman of the Year hlan ni lo mah se Team Athlete of the Year chawimawina hlan a ni a, kum 28-a upa Messi hian season hmasa khan Catalan club chu La Liga, Copa del Rey leh Champions League-ah te a champion pui vek a ni.
Laureus Awards chu?
Laureus World Sports Awards hi kum 1999-a siam ṭan niin kum 2000 khan a vawi khat nan Monte Carlo-ah sem ṭan a ni a, kumin hi vawi 17 an semna chiah a ni. Kum khat chhunga infiamna kawng hranga hranga cheṭha fal bikte bakah tun hma lama sulhnu lo nei ṭha tawhte chawimawi ṭhin an ni.
Professional sports editors, writers leh broadcasters te chuan category 10 siam
aṭangin award pakhat dawng tur hian mi paruk an chhawp chhuak a, Laureus World Sports Academy member-te chuan heng aṭang hian secret ballot hmangin award dawng tur an thlang leh ṭhin a ni.
Grand Slam vawi 17 cham-pion tawh Roger Federer chuan Sportsman of the Year bik hi vawi li (2005, 2006, 2007, 2008) a dawng tawh a, ani aia dawng hnem an awm lo. Footballer zingah he chawimawina dawng hi an la awm lo.
Sportsman of the Year bik hi Usain Bolt (Athletics), Sebastian Vettel (Formula One), Rafael Nadal (Tennis), Michael Schumacher (Formula One), Lance Armstrong (Cycling), Tiger Woods (Golf) te pawhin an lo dawng tawh bawk.
LAUREUS WINNERS LIST
Sportsman of the Year Novak Djokovic Serbia
Sportswoman of the Year Serena Williams USA
Spirit of Sport Johan Cruyff Netherlands
Team Athlete of the Year Lionel Messi Argentina
Breakthrough of the Year Jordan Spieth USA
Comeback of the Year Dan Carter New Zealand
Sportsperson of the Year with a Disability Daniel Dias Brazil
Action Sportsperson of the Year Jan Frodeno Germany
Team of the Year All Blacks New Zealand
Lifetime Achievement Niki Lauda Formula 1