Leicester vs West Ham: Sawi zui hlawh referee

Pathianni zan Premier Lea-gue-ah champion beisei Leicester City leh West Ham te 2-2 in an inhnehtawk a, inkhelh zawhah sawi hlawh ber chu referee Jonathan Moss a ni.

Red card pakhat phawrh a ni a, penalty pahnih awm lo tak tak hmuh tur a awm bawk - hei hi inkhel khaikhawm dan awlsam ber niin a lang.

56 Min:

Leicester City-in Vardy goal hmanga 1-0 a hma an hruai laiin English striker hi Hammers defender Angelo Ogbonna nen ball an inchuhna lamah a dive a, a yellow card pahnihna hmuin hnawhchhuah a ni.

Red card hmuh vangin Leices-ter City striker Jamie Vardy-a'n awm dan chin tawk a hre lo a, mawi lo taka referee laka a chet avangin English FA chuan thubuai siamsakin hremna dang hmachhawn thei dinhmunah a ding mek.

English striker hian red card a hmuh avangin match khat chu a khel thei dawn lo sa a, English FA hian Jamie Vardy buaina angah hian thla hmasa khan Chelsea striker Diego Costa chu match khat dang khel thei lo tur leh £20,000 chawi tura an lo hrem tawh avangin Vardy hi Spain striker hremna ang tho hi pek a nih rin a ni. Champion tum Foxes tan chanchin lawmawm a ni thei lo.

Leicester City hi player-te thunun zawh loh avangin thubuai siamsak an ni bawk a, Vardy thubuai nen Ningani zan dar 10:30 thleng khinletna hun siamsak an ni.

English legend Alan Shearer chuan, "Vardy kha a dive ngei a, card pek tur a ni. Mahse Cheikhou Kouyate laka a card chawi hmasak erawh card chawina tur a ni lo a, thutlukna ṭha lo tak a ni," tiin referee a sawisel.

84 min:

Hammers-in corner an pet dawnin penalty box-ah player an in nek buai a, referee-in warning a pe. Leicester captain Wes Morgan leh Winston Reid-te ball inchuhna lamah Reid-a tlu hma hret a, referee-in penalty a pe a, Andy Carroll-a'n goal-ah a chantir.

Foxes manager Claudio Ra-nieri chuan, "Referee thu-tluk-naah sawi tur ka nei lo. Keichuan ka player-te khelh dan ka zir chiang a, referee thutlukna ngaihtuah turin hun ka nei lo," tiin referee a sawisel duh lo.

89 min:

Ogbonna-a'n penalty area chhungah Robert Huth nghawngah kuahin a foul a, penalty tur nia lang hi referee-in penalty-ah a ngai tlat lo. Aaron Cresswell-a goal vanga Hammers laka 2-1 a hnufual lai Leicester tan hriatthiam a harsa.

Hammers player hlui leh BBC pundit Ian Wright chuan, "West Ham penalty kha penalty-ah an ngai a nih chuan hei phei chu penalty a ni chiang lehzual a ni," a ti.

94 min:

Leicester substitute Jeffrey Schlupp chu Andy Carroll-a'n na lo tein a nek a, a tlu. Referee-in penalty spot a kawk a, Foxes-in an si phurh an sut zo.

Hammers striker Andy Car-roll chuan, "Thutlukna chhe tak a ni. Referee khan a tihsual thup nan penalty a pe ni berin ka hria, chu chu mi zawng zawng sawi dan a ni," tiin a ṭawng na hle.

West Ham boss Slaven Bilic chuan, "Penalty a ni lo, mah se referee khan Premier League hmahruaitu leh an fan-te kha a ngaihtuah tel a ni," tiin referee chu Foxes khelmuala an khelh vang maia penalty peah a ngai.

Chhinchhiah tlak

Ni thum liam taa inkhel hi season zawh thlenga sawi zui tlak ni tur khawpin a nghawng a lian thei tlat. Leicester hi season ṭan hmain pawisa thapna lamah chuan champion tura rin lam ni loin relegate tura rin zinga mi an ni. Season a tawp dawn meuh chuan an result avangin champion rinkai ber an ni tawh a, amaherawhchu Tottenham Hotspurs dah bo theih an la ni lo.

Premier League season hriatthiam harsa takah hian season tawp lamah inlehthalna a la thleng thei a, Foxes hian 2013-14 season-a Liverpool anga nomawi an chan a nih chuan Leicester ṭantute chuan West Ham nena an inkhel hi an theihngilh tawh lo ang.