Nomawi inchuh Barca, Atletico leh Real inlan dawn

Barcelona-in April thla tir kha chuan league-ah point kuain hma an hruai fal a, La Liga nomawi chawi tur chiangsa a ngaih an ni tawh.

Mahse, tun dinhmunah erawh Barca leh Atletico Madrid ten point 76 ve ve an hmu mek a, pathumna Real Madrid chu point khat chiaha an hnufual rih bawk avangin nomawi chawi thei team pathum an awm leh tawh a, match khelh hmabak vawi nga ṭheuh an la neih avangin an dinhmun a la inthlakthleng vek thei a ni.

Zanin dar 11:30 hian Bar-celona chu Deportivo khel-mualah an leng lut ang a, dar 12:15-ah Athletic Bilbao khelmualah Atletico Madrid leng lutin dar 1:30-ah Real Madrid chuan Villar-real an lo mikhual thung ang.

Barca an ral?

Catalan Club hi Atletico Madrid hneh loin Champions League aṭangin an tla a, La Liga lamah pawh ankhelmual Nou Camp-ah ngei Valencia 2-1 a an hneh loh zui avangin an dinhmun a ṭha lo rih hle. An thiampuipa Lionel Messi-a'n a goal 500-na khung tawh mah se a club tan beiseina a siam thei rih bik lo.

Mahse, defender Gerard Pique chuan an inrintawk thu sawiin, "Kan khelh dan pang-ngaia ṭha taka kan khel zel thei a nih phawt chuan league nomawi hi chu kan chawi ngei ka beisei. Kan khelh danah lungngaihna tur a awm hran lo a, chet fuh loh chang awm mah se insiam rem nghal turin huaisenna kan nei," tiin a sawi.

Barca hi tun hnaiah che fuh tawk lo mah se, league match an khelh hmabak pangaah hnehna an chang vek a nih chuan nomawi an humhim dawn a, May 22 khian Sevilla nen Copa del Rey final khelh tur an la nei bawk a ni.

Torres-a'n a naute a fuih

Diego Simeone-a kaih-hruaina hnuaia team tlo tak Atletico hian Champions League semifinal an lut tawh a, La Liga nomawi chawi ngei an inbeisei bawk. Tun hnaia che ṭha tak Fernando Torres chuan tun dinhmunah chuan Athletic Bilbao nen an inkhelh tur chu a pawimawh ber rih thu a sawi.

Tunhnai a match hnuhung palia goal khung vek Torres chuan, "Thui tak ngaihtuah a ṭul chang a awm ṭhin a, mahse tunah chuan Champions League semifinal kan khelh tur aiin Bilbao kan hmachhawn tur hi a pawimawh zawk. Hun hlimawm leh nuam tak hmang mek mah ila a tawp kan la thlen miau loh avangin inthlahdah theih a la ni lo a, rilru fim tak pua kan awm a ṭul," tiin a sawi.

Real tan final

Barcelona leh Atletico Madrid te khingpui tur ai chuan zanina Real Madrid khingpui tur Villarreal hi team khauh zawk tura ngaih an ni a, defender Marcelo chuan final anga pawimawh a nih thu a sawi. Villarreal hi league table-ah palina an ni a, point 60 hmuin pathumna Real an thlauhna erawh point 15 zet a ni thung.

Brazil international Marcelo chuan, "Mi tam tak an beidawn hnuah pawh Real chu kan beidawng ngai lo, a chhan chu kan kiangah min phatsan ngai lo tu fans an awm vang a ni. Kan dinhmun hi a ṭha bera ding kan ni lo tih kan inhria a, mahse hetiang boruak sang leh hautak hi kan lo tawn fo tawh anih avangin kan buai ve dawn lo. Inkhelh hmabak zawng zawng hi kan tan final a ni vek tawh a, chetsual a thiang tawh lo," tiin a sawi.