Wawrinka-a'n beisei a nei sang

Grand Slam vawi thum champion tawh Stan Wawrinka chuan season thar a thlirlawk a, tun hnaiah hliam vangin buai fo mah se nakkum atan erawh beisei a nei sang niin a coach Daniel Vallverdu chuan a sawi.

Wawrinka hi khawvel tennis player ṭha berte zinga mi a ni. Mahse, a khup hliam vangin a buai ngun a, vawi thum ngawt an zai tawh. ATP hnuaia nomawi a chawi hnuhnung ber chu 2017 daih tawh kha a ni hial.

Kum 35 mi Wawrinka hian 2019 khan tournament pahnihah final a lut a, nomawi erawh a chawi lo. Season liamta khan Australian Open quarterfinal thlengin inelna lianah chuan a thlen san ber a ni.

Stan chungchang sawiin Vallverdu chuan, ""Season thar lo awm tur hi chona a ni dawn a, a pawimawh chu hliam nei loa inkhelh tam theih a ni ang. Tunah chuan kum thar atan training kan nei ṭan leh tawh ang.

"Theihna sang tak a nei a, tawnhriat a nei ṭha hle bawk. Hliam nei loa a khel a nih chuan khawvela a ṭha ber berte nen pawh an la inkhel tawk hle tih a chiang, chumi tur chuan training neih ṭhat hmasak a ngai a ni," a ti.

Rafael Nadal, Roger Federer leh Novak Djokovic te an awm avangin player dang tan kawng a inhawng lo tluk a ni a, player ropui pathum awm karah Wawrinka hian major title pathum ngawt a la thei lo.

Swiss coach Vallverdu hian tun hmain Andy Murray leh Juan Martin del Potro te pawh a lo thawhpui tawh a, a hnampui nen season an hmang tur chu a phur thu leh Stan nen beisei an neih san thu a sawi bawk.