Hyderabad chakpuitu David Warner

Thawhṭanni zan khan Indian Premier League-ah Sunrisers Hyderabad chuan wicket sarihin Mumbai Indians an hneh a, Hyderabad tan run 90 siamtu David Warner a langsar hle.

Rajiv Gandhi International Stadium, Hyderabad-ah Mumbai an bat hmasa zawk a, over 20 chhunga run 142 siamin mi paruk an hloh.

Mikhual team tan run 54 siamtu Ambati Rayudu leh run 49 siama a tawp thleng dam Krunal Pandya-te'n khel ṭha mah se batsman dangin an thlawp ṭhat tawk loh avangin Mumbai-in run an siam hnem thei lo.

Hyderabad-in over 17.3 lekah run 145 siama mi pathum hlohin an target an umpha der a, captain Warner chuan run 90 siama a tawp thleng damin a khel ṭha fal hle.

Bowling lamah Hyderabad tan Barinder Sran a khel ṭha fal a, kum 23-a upa fast bowler hian over liah run 28 chiah pein wicket thum a la.

Mumbai Indians tan over li a vawma run 24 lek pe chunga wicket thum latu Tim Southee khel ṭha viau mah se New Zealand fast bowler hian David Warner a chelh theih bik loh avangin a team a chakpui zo lo.

Zanin dar 8:00-ah Mumbai Indians leh Royal Challengers Bangalore an inkhel dawn a, Wankhede Stadium, Mumbai-ah an inhmachhawn ang.