Foxes ûmtu Spurs thawm a ring

Tottenham Hotspurs-in Britannia Stadium-ah buaina an tawk ve lo a, Thawhṭanni zan khan awlsam takin Harry Kane leh Dele Alli te'n goal hnih ve ve khungin Stoke City 4-0 in an sawp.

Premier League match li khelh tur la awmah Leicester City-in hma la hruai mah se Spurs nena an inthlauhna hi point nga chauh a ni tawh.

Spurs an chungnung

Spurs-in champion an tum tih lantirin goal khung tumin an nawr nghal a, minute kuana lekah Kane-a'n goal mawi bik a khung.

English striker Kane hian field vei lamah Mousa Dembele nena ball an inpek tawh hnuah Stoke City keeper dan phak loin a ṭhuai lut. Kane leh Shay Given inkarah defender pali an awm a, veteran keeper dem theih a ni lo.

Stoke City-in zan dang an pha lo a ni thei a, chutihrualin an khingpui Spurs an khelh ṭhat tlat avangin Mark Hughes-a hote dem theih an ni lo. Spurs game khai pa ber Christian Eriksen chuan crossbar a pet per a, first half-ah goal khat bak a lut lo.

Minute 67-naah Dele Alli-a'n Stoke offside trap bumin Eriksen ball pek chu Spurs goal hnihna atan 'cool' takin a khung. Minute thum hnuah English rawlthar duhawm hian defender leh keeper a bum vek hnuah a hmaah goal ruak chauh awm mah se goal ban bak a pet per lo. Kum 20-a upa Dele Alli thiamna hi a hlah aṭanga teh chi a ni lo, goal khung thei tura a insiam rem dan chu fak thlaka mawi a ni.

Spurs an chungnung zel a, minute 71-naah game mawi lantirin Eriksen, Alli leh Lamela te ball an inpek kual hnuah Kane an pe a, English striker hian awlsam takin a khung. Minute 82-naah Del Alli chuan Eriksen ball pek chu Spurs goal lina atan a khung leh a, inkhel thununtu Mauricio Pochettino hote an chak chiang hle.

Nomawi chawi tur?

Leicester City-in champion turin match li khelh hmabakah point riat hmuh an la mamawh. Spurs hi an chak chho char char a nih pawhin Foxes-in an khingpuite an hneh chho zel a nih chuan Old Trafford-ah nomawi chawina an nemnghet thei ang.

Amaherawhchu match hnu-hnung ber thlir chuan Claudio Ranieri hoten Jamie Vardy an chan bakah point hnih an hloh a, Spurs-in an khingpui Stoke an sawp bawk avangin nomawi chawi tur hriatthiam a har ta hle.

Eng nge an sawi?

Stoke City manager Mark Hughes chuan, "Spurs ṭhat zia hi dah hniam chi a ni lo a, chutihrualin keini lam pawh kan khelṭha lo ve bawk a ni. Inkhelh ṭan hmaa kan sawi ang kha kan ti thei lo a, second half-ah insiamṭhat tum mah ila chelh rual an ni lo. Kan pha lo em a ni," tiin an tluk lo tih a pawm thlap.

Tottenham manager Mau-ricio Pochettino chuan, "Stoke khan chak tum mah se kan huaisenna leh tumruhna kan lantir a, ka naute khan fak an phu a ni. Kan khelh dan kha en let leh pawhin chhuan tham a ni a, pressure na takah kan buai phah lo a ni," tiin a naute a fak hle.