A sang paliah Tuikual North leh Tanhril

Mizoram Football Asso-ciation buatsaih, All Mizoram U16 Inter LC/VC Football Tournament 2016 hmawr bawk a hnai. Nimin khan quarterfinal khelh zawh niin Tuikual North leh Tanhril te chuan semifinal an inhlangkai ve leh ta.

Hruaizela Goal

Lammuala inkhelah Tui-kual North leh Salem an in-khel tawk hle a, first half-ah fimkhur taka an goal an ven ve ve avangin goal a lut lo. Second half-ah Tuikual North tan R. Lalhruaizela a rawn inlar a, rawlthar beisei awm Lalhruaizela hian minute 57-naah he inkhela goal awmchhun hi a khung. Hruaizela hian last 16-ah Ram-hlun Sports Complex 2-1 a an hneh ṭumin chakna goal a lo khung tawh bawk.

Salem Veng hian inelna ṭan-tirh lamah goal khung an awlsam a, stage sangah harsatna an tawk. Salem hian last 16-ah Ramthar lakah goal an khung lo a, penalty shootout-ah 4-1 a chakin tlang mah se Tuikual North lakah erawh an vannei zui thei ta lo a ni.

Tuikual North an hmuhnawm a, semi final-ah kan hmu leh dawn e.

Hei le Tanhril

Inkhel hnuhnung zawkah Tanhrilin an tlarhnung phui an chakpui a, an match hnuhnung pahniha goal riat khung thei Tlungvel lakah goal khat chauh chhuahin 2-1 in hnehna an chang.

Tanhril tan Zorinsanga chuan Tlungvel keeper chetsual nangchingin minute 37-naah goal a khung a, chawlhlawk hma chiahin Tlungvel hian an corner hmuh chawr ṭangkaiin Vanlalhriata hmangin an sut.

Defender leh keeper inman tawk loh karah Lalhruaizela chuan Tanhril tan minute 77-naah chakna goal a khung a, Aizawl khaw pawn team hmuhnawm leh fans nei ṭha Tlungvelin thapui thawh leh mah se semifinal lut turin an si phurh an sut thei tawh lo.

Hmabak Semifinal

Ningani aṭang hian semifinal khelh tur an ni a, chhun dar 12:00-ah Kawrtethawveng hneh-tu Kanan leh Zemabawk pet chhuaktu Kawnpui VC III an inhmachhawn ang.

Chawhnu lamah Tuikual North leh Tanhril an inhma-chhawn zui bawk ang. Inelna hi Inrinnia zawh fel tura ruahman niin final khelh hmain pathumna zawnna inkhel a awm bawk ang.