Zaninah Merseyside Derby; United tan fiahna
Tun hnaia khel ṭha tluang tak Liverpool chu zanin dar 12:30-ah Premier League khel turin an inlan dawn a, Merseyside Derby-ah Everton nen an inhmachhawn ang.
Champions League khelh inbeisei Manchester United-in dar 12:30-ah vek Crystal Palace an mikhual dawn bawk a, Palace hi Arsenal nena inhnehtawk hlim an nih avangin United tan chak a awlsam dawn lo.
Zanin hian Leicester cham-pion kalkawng ti harsa tu West Ham-in Watford an mikhual bawk ang. Reds, United leh Hammers te hian Champions League khelh beiseina an la nei vek a, club pathum inchuh ber nia lang zawk erawh Europa League hmunruak a ni.
Europe aiah Premier League
Liverpool-in Europa League-ah semifinal an lut tawh a, Reds tan season thara Champions League khelh theihna awlsam ber nia lang chu Europa League hi a ni. Mahse, Liverpool manager Jurgen Klopp-a'n ngaihdan hran a nei a, Premier League aia ngaih pawimawh a nei lo.
Pathianni zana AFC Bourne-mouth an hneh ṭuma player naupang zawk chhawrtu manager chuan, "Ka player-te hnenah player ka siksawi kual nasat chhan chu tournament dang atana player chawlh ka pek vang niloin Premier League hi kan tana pawimawh ber a nih vang zawk a nih thu ka hrilh. Tournament dang ngaih pawimawh tih vel avanga player chawlhtir hi ka ngaihdan a ni ve lo a, player
ṭha leh fit zawn chhuah zel hi ka duh dan a ni. Europa League hmain Premier League match hnih kan la nei a, Europa League ngaihtuah hman kan ni lo," tiin Everton an hmachhawn hunah an theihna zawng zawng nen an khelh tur thu a sawi.
Team pahnih an inhmachhawn hnuhnung 11-ah Liverpool an la tlawm miah lo. Reds-in vawi li hnehna an chang a, vawi sarih inhnehtawkin Reds an chungnung zawk. Everton-in Reds laka hnehna an chan hnuhnung ber chu October 2010 daih khan a ni tawh a, an ṭhenawm team laka an record duhawm lo hi Everton-in zaninah thai reh an tum ang.
Champions League beisei
Manchester United-in an league match hnuhnung berah Marcus Rashford-a goal hmangin Aston Villa hnehin pangana dinhmun an luah a, Champions League khelh an beiseina chhi nung turin Crystal Palace hneh an tum ang.
Red Devils midfielder Juan Mata chuan, "Aston Villa laka hnehna kan chan avang khan tun hnaiah inrintawkna nasa tak kan nei a, kan phur hle a ni. Tuna kan tum ber chu season thara Champions League khelh a ni a, kan thil tum ti hlawhtling tur hian kan duh ber chu kan hmabak match awm apianga chak chhoh zel hi a ni. Old Trafford-ah fan-te hmaa inkhel tur kan nih avangin kan theihtawp kan chhuah ang," tiin season thara Champions League khelh ngei an tum thu a sawi.
Team pahnih an inhmachhawn hnuhnung sawmah United-in vawi sarih hnehna changin vawi thum an inhnehtawk a, league match-a an inhmachhawn hnuhnung berah Juan Mata goal khung hmangin United hi a chak zawkah an ṭang.