Aizawl FC tan ka khel ang - Mama

Pathianni zanah Shillong Lajong khelmual JN Stadium-ah East Bengal an lenglut dawn a, Aizawl FC-in match khelh tur nei lo mah se Shillong-a inkhel tur hi MPL champion hmalam hun hriltu a ni.

Red and Gold Brigade midfielder S. Malsawmtluanga chuan, "East Bengal chuan a zawna chak loh hi kan duh lo a, champion thei tawh lo mah ila kan theihna zawng zawngin kan khel ang. Result hian Aizawl FC hmalam hun a nghawng theih avangin ka ngai pawimawh em em a, coach-in chance min pe a nih chuan Mizo club tan hian ka theihna zawng zawngin ka khel ang," tiin an match hnuhnung ber a lak thutak thu a sawi.

Club chhung buaina

East Bengal-in khualmualah Bengaluru an hneh lo a, Blues champion-na kawngah Kolkata club an hneh hi a pawimawh. Bengarulu hneh loh zawhah East Bengal coach Biswajit Bhattacharya a bang a, club chhung buaina a sawi chhuak.

Kolkata club chhung buaina belchhah turin captain Robert Lalthlamuana leh defender Rahul Bheke-te chu Thawh-
ṭanni zing khan practice-naah an inhliam a, Paris Saint Germain defender hlui Bernard Mendy chuan inhliam vang thoin club training a la zawm lo bawk a, Kolkata club tan defender pathum hian Shillong an pan a beiseiawm loh.

Khaw lum hnuaia khel ṭhang Bengal tan chanchin lawmawm loh dang a awm a, tun hnaiah Shillong khawpuiah ruah a sur nasat avangin khaw vawt hnuaiah an inkhelh a ngai dawn.

Hetihlai hian East Bengal coach thar tur Trevor James Morgan chuan Thawhṭanni khan Kolkata khawpui a thleng tawh. Federation Cup aṭang chauha East Bengal enkawl tur nia an sawi Morgan hian nimin khan training lai a thlir a, Shillong-ah Red and Gold Brigade hi a kaihhruai a nih chuan club chhung buaina a ziaawm ang.

I League aṭanga tla thei dinhmuna ding Lajong hian season thara I League khel turin draw result hmangin an him theih dan awm mah se inkhel dang result-ah an innghah a ngai dawn a, midang result-a innghah ai chuan chak result hlawhchhuah ngei tumin an khel ang.