January thlatirah WTA season?

Hmeichhe tennis thuneitu sang Women's Tennis Association chuan season thar hman ṭan dan tur a duang a, January thlatir hian Australian Open khelh hmain inelna buatsaih theih an inbeisei.

Tennis Australia (TA) chuan January 18 aṭangin Australian Open buatsaih an tum, inelna neih ṭan hmain player ten Melbourne khawpui an thlen hmasak a ngai, khunghran hmasak an ngai dawn. Khung hran chhung hian an training thei dawn thung.

WTA chief Steve Simon chuan, "Kum thar chawlhkar hmasa berah inkhelhna tur a awm theih a beisei awm, kuminah match an khelh tam loh avangin player ten inkhelh an chak tawh hle, an rilru kan hriatthiam a pawimawh.

"Tournament buat-saihna tur ber erawh sawi fak theih a la ni lo. Hri leng hian harsatna min la thlen dawn niin a lang a, chuvangin kum tir aṭangin a tam thei ang ber an inkhelh theihna tur kan ngaihtuah a ngai," a ti.

Australia bakah China leh New Zealand te chuan mikhual thlen chungchangah inkaih-hruaina an la siam khirh hle a, hei vang hian an ram aṭanga player zing chhuak turte pawhin harsatna an la tawh dawn niin a lang.