Salah-a'n record a siam

Champions League last 16 lut chiang sa chunga group stage match hnuhnung ber khel Liverpool chuan khualmualah 1-1 in Midtjylland an inhneh-tawkpui a, Mohamed Salah chuan Liverpool tana record siamin goal-a khung. 

Salah hian second 55-na lekah inkhela goal hmasa zawk a khung a, Champions League-a Liverpool goal rang ber a nih bakah he inelnaa Liverpool tana goal khung hnem ber record a siam. 

Egyptian forward hian Champions League-ah Reds tan match 41 khelin goal 23-a khung tling ta a, club legend Steven Gerrard-a'n Champions League-a goal 22-a lo khung tawh chu a rawn khum a ni. 

Liverpool boss Jurgen Klopp chuan, "Player thiam bik a ni a, Salah nena kan thawhdun hnuah hian he club tan hian engkim hi a fuh vel vek a ni ber," tiin a forward a fak. 

Mahse, player nau-pang rual nena inlan Liverpool-in Salah chet ṭhat zanah hnehna an chang zo lo a, Danish club Alexander Scholz chuan penalty hmangin an si phurh a sut - mualneitu team tan Evander chuan bar a tih per bawk. 

Jurgen Klopp-a'n a lo sawi lawk tawh angin player naupang rual chungah rinna a nghat a, Liverpool chhul chhuak Trent Alexander-Arnold chu captain armband a hren tir a, kum 19 mi Rhys Williams chuan bul a ṭan bawk. 

Kum 19 mi midfielder Leighton Clarkson chuan Champions League-a a match hmasa berah bul a ṭan nghal a, bench aṭanga luhtir  Billy Koumetio chu kum 18 leh ni 25 mi niin Liverpool tana Champions League khel thei naupang ber a ni.