Atlanta Hawks a chak nawn

Nilaini zing khan NBA Eastern Conference first-round playoff khelh chhunzawm a ni a, Atlanta Hawks chuan Boston Cel-tics lakah 89-72 in hneh-na an chang. Hawks hian best-of-seven series khelh turah 2-0 in hma an hruai ta.

Philips Arena-a in-khelah shooting guard Kyle Korver leh power forward Al Horford an che ṭha a, point 17 ve ve an hlawh chhuak. Hawks hian quarter khatnaah 24-7 ngawtin hma an hruai fal nghal a, a tawp thlengin an hawi kir tawh lo. Inrinni zingah game thumna khelh leh a ni ang.

Celtics lamin series hmasa zawka inhliam point guard Avery Bradley awm loh an tuar a, amah aia lut Marcus Smart-a'n beisei a phak lo hle. Smart hian quarter hmasa pathumah point a score miah lo a, fourth quarter-ah point thum a hlawh chhuak hram a ni. Point guard Isaiah Thomas chuan point 16 score-in Amir Johnson-a'n point 14 thawkchhuak ve bawk mah se hnehna an chang zo ta chuang lo.

Inkhel dangah San Antonio Spurs chuan a vawi hnih nan Memphis Grizzlies chu 94-68 in an hneh ve leh bawk a, series hmasa zawkah 106-74 in hnehna an lo chang tawh bawk.

NBA playoff history-ah Spurs hi an match hmasa pahniha point 25 aia tama chak lo pathumna chiah an ni.

Spurs coach Gregg Popovich chuan a naute khelh dana a lawm loh thu sawiin, "Turn over kan ngah lutuk kha kan chak lohna chhan bulpui pakhat a ni a, kan insiam ṭhat thuai a ngai a, kan tihsual aṭangin kan inzir ang a, inkhelh vawi thumnaah chuan hnehna changtu zawk nih ngei kan tum tawh ang," tiin a sawi.