Leicester inkhel hamtu an thlang fuh lo

Premier League champion tura ngaih Leicester City-in match nga a zawna hnehna an chan hnuah West Ham nen 2-2 in an inhnehtawk a, referee Jonathan Moss ham danin sawi zui a hlawh zel.

Foxes leh Hammers inkhelah hian a tirah tak chuan Kevin Friend chu referee tura ruat a ni. Amaherawhchu Tottenham Hotspurs ṭantuten Friend hi Leicester-a khawsa a nih avangin an sawisel a, Professional Game Match Officials Ltd (PGMOL) lamin a thlak nan Moss an hmang.

Fuh chiah em?

Referee thlak chungchangah hian ngaihdan a inang lo a, Arsenal boss Arsene Wenger chuan a sawisel.

Gunners boss chuan, "Tun anga thutlukna an siam zel chuan kar tinin referee thlan chungchangah harsatna a awm ang a, a thlaktu hmabak chu huphurhawm tak a ni. Hetiang sut kian dan ṭha ber chu an chenna lam ngaihtuah a ngai lo a, an club ṭan ngaihtuah a ṭul lo - referee ṭha ber thlan mai tur a ni," tiin a sawi.

Premier League-a referee thlan dan hi a fuh chiah em tih hi sawi zui tham a ni.

Engtin nge an thlan?

Leicester leh Hammers inkhelh ṭuma referee Kevin Friend hian Thawhlehni zana Manchester City leh Newcastle te 1-1 a an inhnehtawk ṭumin a ham thung.

Premier League referee-te hian season ṭan hmain an chenna hmun leh an club ṭan thuneitute hnenah an hriattir vek a, an khaw club emaw an club ṭan inkhel an ham ngai lo tluk a ni.

PGMOL hotu hlui Keith Hacket chuan, "Season tirah referee-te chanchin uluk taka zir chian a ni a, chu chuan inkhela hamtu tur thlan a ti awlsam
ṭhin. Entir nan Sheffield-a cheng referee chuan Sheffield khaw club inkhel a ham lo ang," tiin a sawi.

Premier League referee hlui Mark Halsey chuan, "Bolton-a cheng ka nih avangin Bolton inkhel ka ham ngai lo. Leeds khuaa cheng tan Leeds club inkhel a ham theih loh," tiin match referee ruat dan kalhmang a sawi chiang hle.

Mahni chenna

club ham ta se?

Hasley hi QPR fan a ni a, an club ṭan hi vawi hnih a ham hnuah tuna an dan hman 'club ṭan emaw chenna khaw club emaw ham theih loh dan' hi siam a ni.

Halsey chuan, "QPR khelmual Loftus Road aṭanga 56 km lekah ka cheng a, an inkhelh vawi hnih ka ham ṭum hian vawi khat an chak a, vawi khat erawh an chak lo. Khatih hunlai kha 1990 daih tawh kha a nih avangin ka sawi chhuak lem lo a, mah se a awlsam lo. Kan club ṭan inkhelah chuan an chak a lo lawmpui ve mai te a châkawm avangin ham loh hi a ṭha zawk a ni," tiin hotute hnena club ṭan hriattir mai a ṭhat thu a sawi.

Fuh tawk lo chu

Referee Friend-a'n Leicester inkhel a ham loh laiin Crystal Palace-in Norwich City an hneh
ṭuma hamtu chu Newcastle Unied ṭantu Michael Oliver a ni. Palace leh Norwich hi Magpies nen tla thei dinhmunah an ding vek a, hei vang hian remruatna fuh tawk lo chu a awm niin a lang.

Halsey chuan, "Hotu lamin an mawng an hlim maiah ka ngai," tiin tihsual an neih ve tho thu a sawi.

Leicester leh West Ham-a referee Moss hian zanina Arsenal leh West Bromwich Albion te inkhel a ham dawn a, FA Cup semifinal-a Manchester United leh Everton inkhelh hunah fourth official a ni bawk ang.

Referee famkim tawk lohna hmuh tur a awm fo a, anmahni enkawltute remruatna fel tawk loh a awm tel avangin zaninah chuan Moss hian player ang thoin en bik a hlawh ang.