German Cup Final lut turin Bayern-in Bremen an hneh
Bayern Munich-in treble champion nih an tumna kawngah hmalam an pan zel a, Thawhlehni zan khan Werder Bremen chu German Cup semifinal-ah 2-0 a hnehin final an lut.
Bundelsiga hmahruaitu club tan Thomas Mueller chuan goal hnih a khung a, a goal hmasa zawk hi Xabi Alonso corner aṭanga minute 30-naa a tauh luh a ni. Second half-ah Muller bawkin goal khat dang a khung leh a, a goal hnihna erawh penalty aṭanga a chhuih luh a ni.
Bayern penalty hlawh tur hian Arturo Vidal chu Janek Sternberg nen ball an inchuhna lamah penalty area-ah a tlu a, mah se Juventus midfielder hlui hi Bremen defender hian a tawk fuh lo niin a lang a, Vidal-a chet danin dem a hlawh.
Bayern beiseina
Season thara manager Pep Guardiola-a'n a chhuahsan tur Bayern Munich hi inelna pathumah an la dam kim vek a, kum 2012-13 season-a Jupp Heynckes hoa an lo tih lo tawh nomawi pathum chawi turin an dinhmun a ṭha tawh hle.
German Cup semifinal pakhat zawk chu nizan khan Hertha Berlin leh Borussia Dortmund-te'n an khel a, he chanchin buatsaih a nih lai hian an result kan hre hman lo. A chak zawk hian May 21-ah Bayern nen final an khel dawn a ni.
Bundesliga-ah Bayern Munich-in match li khelh la hmabak chungin point sarihin hma an hruai fal tawh a, an hmabak match hnihah an chak leh a nih chuan um phak theih an nih tawh dawn loh avangin league nomawi an chawi ang.
German club hian Champions League-ah semifinal an lut tawh bawk a, semifinal first leg chu April 27 khian Atletico Madrid khelmualah an khel ang. Champions League nomawi chawi erawh Bayern tan a awlsam dawn lo - Atletico hi champion tura beisei Barcelona hnawtchhuaktu an ni.
Muller a ropui
Kum 26-a upa German forward hian Bayern Munich tan match 347 a khelhah goal 151 a khung tling ta a, a record hi a ropui hle. Bayern Munich tana nomawi chawi theih deuh thaw zawng zawng chawi kim tawh Muller hian tun season-a Cup match li a khelh tawhah goal li a khung tawh a, Champions League-a vawi 10 a inlanah goal riat khungin league match-ah bik vawi 28 inlanin goal 19 a khung. Tun season-ah Bayern tan inelna hrang hrangah match 43 khelin goal 31 a khung tawh a, German club tan an innghahna a ni.
Thukhawchang
Bayern Munich manager Pep Guardiola chuan, "Hnehna kan chan avangin ka lawm a, Berlin khawpuia final khelh ka chak tawh takzet a ni. Bremen hian an semifinal kalkawngah Borussia Monchengladbach leh Bayer Leverkusen-te an hneh a, team huaisen tak kan tum dawn tih hi kan hre lawk a ni," tiin an khingpuite a fak.
Pep chuan inkhel chungchang sawi chhunzawmin, "Kha aia na zawka goal nawr tur kan ni a, khati chung chung khan goal khung theihna hun ṭha kan nei nual tho a ni. Vidal-a penalty hlawh erawh penalty a ni lo a, referee khan a tisual a ni," tiin penalty hlawh tura tlu der a midfielder Vidal a dem.
Goal hnih khungtu Muller chuan, "Kan chak result avangin kan lawm a, mah se kha aia ṭha zawka khel thei kha kan ni. Ball kan in pass sual nasat avangin Werder tan hmun awl kan siamsak hnem em em a, kan tihsual vangin game kha kan ti harsa a ni," tiin chak mah se an chak danah a lawm tawk lo.
Bremen coach Viktor Skripnik chuan, "Bayern lawmpui hi kan tih theih chhun a ni a, kawng paltlang theih loh paltlang tumin theihtawp kan chhuah a ni. Referee sawisel a ṭulna ka hre lo. Ṭha taka khel chunga kan chak zawh loh avangin ka naute erawh ka tawrhpui a, an khelh danah ka chhuang takzet a ni," tiin a naute khelh danah a lawm thu a sawi bakah chak lo mah se penalty a sawisel duh lo.