PSG an la chuai lo

Champions League aṭangin tla tawh mah se tun season-a Paris St-Germain chet dan hi sawi nep theih a ni chuang lo. Zlatan Ibrahimovic goal khung hmangin Lorient 1-0 in an hneh a, French Cup final an lut.

Thawhlehni zan inkhelah Ibrahimovic chuan minute 75-naah Angel di Maria thawhrah sengin tun season-a a goal 43-na a khung a, nomawi pathum chawi turin beiseina an nei zel. PSG hian final-ah Sochaux emaw Marseille emaw an hmachhawn ang.

Laurent Blanc-a naute hian French Ligue 1 nomawi an chawi fel tawh a, tun kartawp hian Lille nen League Cup final an khel zui bawk dawn a ni.

Season hmasa khan PSG hi league-ah point riat a sang fal chungin an champion a, League Cup final-ah Bastia 4-0 a hnehin League Cup final-ah Auxerre hnehin nomawi pathum an chawi a, kuminah pawh an nomawi kawl lai hi an humhim vek tura ngaih a ni rih.

Paris Saint-Germain coach Laurent Blanc chuan,"Kan inkhelhna kha artificial pitch a nih avang leh Lorient kha team indin fuh tak an nih bawk si avangin inkhelh a harsa hle. Mahse, kan insiamrem thuai a, goal khung ṭeuh lo mah ila final luhna tawk chu kan khung tho e," tiin goal khata a lungawi thu a sawi.

French manager hian Champions League quarterfinal-a Manchester City an hneh loh chu an lak nat thu leh, an rilru na thawi dam theih nan nomawi chawi an mamawh thu a sawi lang tel bawk.