Norwich leh Sunderland an hrem dawn

Kar hmasa Inrinni Premier League-a inhma-chhawn Norwich City leh Sunderland-te chu inkhelh laia player-te thunun zo lo thubuai English FA chuan a siamsak a, club pahnih hian naktuk zan dar 10:30 thleng an thubuai hi an khinglet thei ang.

Norwich leh Black Cats-te hian an thubuai hi an khinglet lo emaw an khinletna pawm a nih loh chuan FA hian pawisa chawi turin hremna a pe dawn a ni.

Inrinni inkhelah hian Norwich winger Robbie Brady chuan ball an inchuhna lamah Sunder-land defender DeAndre Yedlin chu khelmual sira advertising hoarding su dawr khawpin a nek chhuak a, hei hian buaina ti chhuakin Black Cats manager Sam Allardyce chu thinrim taka inrawlh zingah a tel.

Inkhelh zawhah 'Big Sam' hian, "Ka lo che uchuak deuh a ni mai thei. Mahse, Norwich player-te khan ka dinna lai thleng khan rawn dai kai an tum a, ka player-te leh naute chu ka chhan zel ang," tiin a khawsak danah a inchhir loh thu a sawi.