Kings XI Lal chhung a rei tawk lo

Thawhlehni zan khan Indian Premier League-ah match khat khelh a ni a, Rising Pune Supergiants laka hnehna chang hlim Kings XI Punjab-in an chak chhunzawm thei loin Kolkata Knight Riders lakah wicket rukin an tlawm. Punjab hian match li an hmachhawn tawhah vawi khat chiah hnehna an chang thei a ni.

Punjab Cricket Association Stadium, Mohali-a inkhelah Punjab an bat hmasa zawk a, over 20 chhunga run 138 siamin mi pariat an hloh. Punjab tan run 56 siama a tawp thleng dam Shaun Marsh a hmuhnawm a, a ṭhianten an puih ṭhat tawk loh avangin Kolkata tan target tam tham erawh an tuk thei lo.

Kolkata-in over 17.1 lekah an target umphain run 141 an siam a, mi pali chiah an hloh. Kolkata tan ball 28 lek a hmachhawna run 53 siamtu Robin Uthappa a che ṭha a, run 34 siamtu captain Gautam Gambhir chuan a thawhhlawk viau bawk.

Zaninah inkhel pakhat a awm dawn a, dar 08:00-ah Sunrisers Hyderabad chuan khualmualah Gujarat Lions an lenchilh dawn a ni.