CYMA Inter Branch Cricket Quarterfinal lut tur a hriat kim ta
Nimin khan Suaka Memorial Cricket Stadium, Sihhmuiah Central YMA Inter Branch Cricket Tournament last 16 khelh zawh a ni.
Durtlangin a sang pariat thleng turin Chaltlang chu 47 run in an sawp a, Zemabawk-in wicket ngain Govt Complex hnehin quarterfinal an lut ve bawk.
CYMA buatsaih inelnaah hian Chanmari, Ramhlun Veng-lai, Ramhlun North, Luangmual, Zarkawt, Ramthar Veng, Durtlang leh Zemabawk te an lut.
Hruaizela show
Coin toss-a vannei Chal-tlangin vawm hmasak an thlang a, Durtlang lam tan batsman ṭha K. Vanlalruata'n ball kua lekah run 20 siam mah se a out nghal avangin an hmalam hun a chiang lo. Durtlang tan Lalhruaizela'n ball 56-ah run 70 a vaw chhuak a, Henry Lalsangzuala'n run 26 a belh ve bawk avangin Durtlangin over 20-ah wicket thum hlohin run 151 an siam.
Chaltlang lamin bul ṭan che chhe lo mah se Lalchhuanawma'n over 2.1 lek a vawmah wicket nga lain Durtlang chu quarterfinal an thlen pui a, Chaltlang batsman zingah Joseph Lalmuanpuia chuan ball 32-ah run 31 a siam nachungin midangin an ṭawiawm ṭhat tawk loh avangin Durtlang lamte hi nuamsa takin run 47 in an chak ta a ni.
Zemabawk an chak
Coin toss-ah Zemabawk an vannei a, vawm hmasak an thlang. Zemabawk bowling discipline a ṭhain fielding-ah an thawhhona a ṭha bawk a, over 18.2 a thlen meuh chuan Govt Complex te hi vawm out vekin run 53 chiah an siamtir.
Zembakawk bowler Zathuama chuan vawm ṭha berin run 5 chauh pein wicket thum lai a la a, K. Lalmalsawma pawhin run 7 chauh pein wicket 2 a la ve bawk. Govt Complex batsman Alex Zosanglura'n run 16 a siam tih loh chu midangin tih tham an siam ve lo a ni.
Target hniamte Zemabawk lamin um mah se an fimkhur mah mah emaw tih theih khawpin an khawsa a, wicket a khat tawkin tla ve reng mahse over 12.3-ah an target hi an umpha thei a, Zemabawk hian Govt Complex hi wicket 5 in an hneh a ni.
Quarterfinal Fixture
Suaka Memorial Cricket Stadium, Sihhmui
April 25, ThawhṬanni
09:00 AM Chanmari FC Vs Ramhlun Venglai
12:00 Noon Ramhlun Norh Vs Luangmual
April 26, Thawhlehni
09:00 AM Zarkawt Vs Zemabawk
12:00 Noon Ramthar Veng Vs Durtlang