Khatla TBL-in Phengphehlep an chaih
Tuikual South-in champion lawm turin Hawla Indoor Stadium an pan a, Khatla TBL-in India captain Vishesh Bhriguvanshi leh Pratham Singh an neih tak si avangin Rakesh-a telna Phengphehlep an mualpho.
Thawhlehni zan Mizoram Super League Finals Game 2-ah Khatla TBL an harh chhuak a, champion laiin 106-86 in Tuikual South an hneh.
April 22, Zirtawpni zanah Game 3 khelh a ni dawn a, Mizo basketball hun puiah mipui an ṭhahnem dawn tih a chiang a, nomawi chawi tur erawh a la chiang lo.
Vul lai rei lo
Tuikual South-in Rakesh, Rohlua, F. Zodinthara leh Vanchuangpuia te hmangin Khatla ṭantute an ngawihtir a, 22-10 hial ni hman mah se TBL tan Eddie Zaithanmawia'n kawng sialin Vanlalmuana 3-points in harhtharhna an siam a, India captain Vishesh chu game mawina tifamkimtu a ni.
Khatla TBL-in vawi khatah state pawn player pakhat zel an hmang thei a, Vishesh leh Pratham ten zin chauh an neih avangin coach H. Laldinsanga'n hman chhawk dan a thiam hle. India captain hahdam nan Pratham a inlan zawk a, second quarter-a Vishesh a rawn inlan leh chiah chuan Uttar Pradesh small forward hi Hawla Indoor Stadium-a inlan tawh zingah a thiam ber tih hai rual a ni lo.
Tuikual South vul hun chhung a rei lo a, halftime a nih meuh chuan Khatla TBL-in 51-41 in hma an hruai tawh a, chak tur zawk rinthiam a harsa tawh lo.
Birthday Boy - Rina
Quarter thumnaah Haryana forward Rakesh-a'n inkhelh
ṭantirh lama a chetṭhat chhunzawm leh zawk mah se TBL tan Dawrpui Vengthar tlangval Lalrinzuala a che ropui. Khatla guard Rina hian a piancham lawm nan a zawnin 3 point hlu tak vawi hnih a neih bakah lay up mawi danglam bik nei zuiin 79-52 in TBL hma an hruai a, Tuikual South tan thawhleh ngaihna a awm tawh lo.
Quarter tawp berah ChP-a leh Rakesh te rawn khel ṭha leh deuh mah se Khatla TBL-in harsatna nei loin 106-86 in hnehna an chang.
Vishesh Vs Pratham
Tuikual South-in state pawn player Rakesh chiah an nei a, Khatla TBL-in Vishesh leh Pratham te an neih avangin hahchawlhna hun ṭha an neih an ṭhatpui.
Season liam taa Khatla TBL champion puitu Pratham hian MSL history-a point 100 thlenna hmasa ber a lut a, inkhel pum-puia thlirin Vishesh erawh a pha lo. India captain hi minute 20 leh second 18 a inlan a, a khelh hun chhung hian 56-36 in TBL an chungnung. Hriat tur ṭul erawh hun pawimawh laiin Vishesh a lut a, point 17 a luh bakah steal vawi li zet a neih chu inkhel danglamna a ni.
Amah aia ṭha an awm avang-in Pratham a ṭha lo tihna a ni lo a, Uttar Pradesh forward hian Khatla TBL team chhunga hmun ruak awm tur a hnawh khat ṭha a, awm ta lo se chuan champion lai hi talbuai thei an ni. Chumi nemnghehna chu Pratham-a luh lai hian TBL leh TKS hian point 50 ve ve an score a, chungnung zawk an awm lo.
TBL Thar
Khatla TBL hi an state pawn player ringawt fak theih an ni lo a, game 2-ah team pumpui an khel ṭha. Freethrow-ah hmasawnna hmuh tur a awm a, game 1-a vawi 33-a vawi 10 chauh lut khan vawi 29-ah vawi 16 an lut tawh. Tuikual South-in freethrow vawi 27-ah vawi 16 an luh ve tho avangin inkhel tidanglamtu chu freethrow a ni lo.
TBL chak chhan chu team pumpui khelh ṭhat vang a ni. Gospel Lalthawmmawia, Nelson Lalrohlua leh Eddie Zaithanmawia te'n an rintlak zia an tilang a; Jacob Laldinliana, Julian Lalramdinthara leh David Lalrinchhana te pawh an khelh ṭhat avangin an hming lam hmaih a thiang lo.
A la zo lo
SYS aṭanga Khatla TBL-in coach atana an lak H. Laldinsanga chuan, "Defence leh offence-ah kan khelṭha em em a, sawisel tur ka hre lo. Kan team pumpui thawhrah vanga chak kan ni a, min ṭantute thawm khan minti phur a ni. Game 2-ah chiang takin chak mah ila kan champion chiang-ah erawh ka la ngai lo. Chutihrualin ka inringtawk khawp mai," tiin Vanglaini palai a hrilh.
MSL2 Game 2 final-ah entu mipui an tam a, Khatla TBL hian hmasawnna tur a nei a nih ngai chuan auh hla neih ṭhat leh au rual thiam a ni ang. Tuikual South erawh ṭum dang ang bawkin an supporter-te thawm a ring a, Mission Veng Vikings an hneh ṭuma an tumruhna kha an nei let a nih ngat chuan Khatla TBL an hneh theih lohna chhan tur a awm lo.