Inter Village U16 A ṭha pahnih a hriat dawn
Vawiin hian Lammual-ah All Mizoram U16 Inter LC/VC Football Tournament 2016 semifinal khelh a ni dawn a, chhun dar 12:00-ah Kanan leh Kawn-pui VC III te an inkhel ang a, chawhnu dar 2:00-ah Tuikual North leh Tanhril an inhmachhawn zui bawk ang.
Hei le Kawnpui
Aizawl khaw pawnah pawh khelmual ṭha a awm tawh a, TV aṭangin inkhel duhtawka en tur a awm tawh avangin khawpui leh thingtlang danglamna a awm tawh lo. He thu tifiah tur hian Kawnpui VC III chuan Aizawl chhunga veng leh veng inelnaa team ṭha ṭhin Armed Veng (1-0) leh Bethlehem Vengthlang (2-1) te chu Vanlalngaia goal hmangin an hneh theih bakah College Veng 6-0 a an sawp hnuah Zemabawk an hneh leh bawk. Kawnpui VC III hian final luh beiseina an nei sang hle.
Hetihlai hian Kanan pawh an nep bik lo. Aizawl inkhel thiam veng tia hriat lar an nih tawhna ṭhin kha tidik nawn tur-in rawlthar ṭha an kawl-khawm mek. Kanan tan hian last 32-a Nursery 7-1 a an sawp
ṭuma goal nga khung thei R. Swapana Jeevan Ratna leh quarterfinal-a Kawrtethawveng an hnehnaa goal hnih khungtu Vanlalhruaizela te hi en bik hlawh tur an ni.
Intiat tawk
Semifinal hnuhnung zawka inhmachhawn tur Tuikual North leh Tan-hril-te hi an sulhnu en chuan an intiat tawk hle tura ngaih a ni.
Tuikual North inngahna tur chu R. Lalhruaizela a ni ang. Hruaizela hian last 16 leh quarterfinal-ah a team a chakpui ve ve a, Ramhlun Sports Complex leh Salem an hnehna goal khungtu hi Tanhril tlarhnung tan buaipui tham a tling ang.
Tanhril hian player langsar fal sawi tur nei lo mah se team thawhona ṭha
chu an innghahna tur a ni leh ang. Tanhril hian an match hnuhnung pathum-ah goal hnih an chhuah a, team dang nena khaikhin ralah chuan an tlarhnung hi a phui ṭha hle. Tuikual North lakah pawh an tlar-hma lam ai mahin a hnung lam hi an innghahna tur a ni lehin a rinawm.
Mizoram Football Association buatsaih veng leh veng inelnaah hian team 107 zet an inziak lut a, team ṭhenkhat erawh kum bithliah pel an khelh-tir tih finfiah vangin disqualify an ni. Player pian kum en nan hian birth certificate en
ṭhin a ni a, team ṭhenkhat mahni player-te certificate la lam lo tan a rang lama lak tur a ni ang.