Arsenal fans an beidawng?

Premier League nomawi an chawi loh hnuah kum 11 a liam tawh a, Arsenal-in kuminah league title an beiseina a tlem tawh em avangin fans an lungawi tawh lo, Gunners fans ruhkawlte pawhin an manager Arsene Wenger lakah rinna an nghat ngam tawh lo niin a lang ta.

Arsenal hian an league match hnuhnung pahnihah West Ham leh Crystal Palace lakah goal khung hmasa ṭhin mah se an hum theih loh avangin hnehna an chang zo lo a, Gunners ṭantuten an player leh manager an au el hial.

Zanin dar 12:15 hian Arsenal-in Emirates Stadium-ah West Brom an lo mikhual hun atan hian season ticket neitu ṭhenkhat chuan inkhel en loh an tum hial. Club hotuten supporter nge pawimawh tun dinhmun an thlen theihna chhan manager Arsene Wenger tih an buk chhoh ṭan a ṭul ang.

Gunners hian Premier League bikah match 499 hnehna an chang tawh a, anni aia record nei ṭha chu Manchester United (583) chiah an ni. Mahse tun hnai an league match hnuhnung vawi 13 aṭangin vawi li chiah hnehna an chang thei a, zanina an mikhual tur West Brom ai hian vawi khat chiahin an chak tam zawk.

Kumin January thla kha chuan Gunners hi league hmahruaitu an ni a, mahse tunah erawh palina dinhmun an luah tawh. Manchester United aiin point li chiaha an san avangin season tharah Champions League an khel ngei ang tih pawh a chiang tawh bik lo.

French manager Wenger hian kum 1996 aṭang khan Arsenal hi a enkawl ṭan a, league-ah vawi thum a champion pui tawh bakah FA Cup nomawi vawi ruk a chawi pui tawh bawk. Kuminah erawh thil mak a thleng a nih ngawt loh chuan title beisei thei dinhmunah an ding tawh lo.

Tun dinhmunah Leicester City-in point 73 hmuin hmahruaitu an ni mek a, pahnihna Tottenham-in point 68 an hmu thung. Foxes hi an champion a nih pawhin Gunners fan-te chuan an ngaidam thei a ni maithei. Amaherawhchu, Spurs lamin White Hart Lane-ah league nomawi an hawn a nih chuan an pawm dam thei hauh lo ang.

Arsenal midfielder Jack Wilshere chu a hliam dam tawhin Under 21 team-ah khel thei tawh mah se first team-ah a inlan theih a la beiseiawm loh a, Santi Cazorla leh Alex Oxlade-Chamberlain te erawh an hliam a la dam lo thung.