Napoli an la ṭang fan fan

Italian Serie A season kal mekah Juventus chu champion tura rinkai ni tawh mah se Napoli pawhin beidawng duh loin an um ve zel a, Thawhlehni zan khan Bologna chu 6-0 a sawpin beiseina an neih an la chhem nung ve zel.

Stadio San Paolo-a inkhelah hrem vangin Gonzalo Higuain inlan thei lo mah se Dries Mertens a awm avangin Napoli tan buaina tur a awm lo. Belgian international Mertens hian hat-trick siamin Manolo Gabbiadini-a'n goal hnih a khung bawk a, David Lopez chuan hun tawp dawngah an goal rukna a khung bawk.

Napoli hian match 34 khelh tawh aṭangin point 73 an hmu a, hmahruaitu Juventus nen an inthlauhna chu point rukah a tlahniam leh rih. Mahse nizana Juve inkhel result a zirin an inthlauhna hi a la danglam leh thei ang.

Serie A aṭang hian a sang pahnih chiahin direct-in season tharah Champions League an khel dawn a, pathumnain playoff an khelh a ngai thung. Tun dinhmunah AS Roma chuan point 65 hmuin pathumna dinhmun an luah mek a ni.