Zahna kawnah Man United leh Liverpool an intâwk

Jose Mourinho hoin Tottenham Hotspur-in Old Trafford an luhchhuah a, Manchester United 6-1 in an sawp. Ole Gunnar Solskjaer leh a naute an mualpho a, an chak loh dan hi an football career-a an hun tawn zahthlak ber zinga mi tih theih tur a ni.

Pathianni zanah Man United chauhin zahna kawn an zawh lo a, Liverpool-in anmahni chauha an zah an rem ti lo! Premier League champion hi Aston Villa-in 7-2 in an sawp a, club inhal pahnihin zahna kawn an zawh dun.

Premier League-ah Everton-in hma an hruai a, Aston Villa leh Leicester City-in an dawt. Champion rinkai zinga mi Manchester City chu 14-naah an awm a, an ṭhenawm club Manchester United chu 16-naah an awm a, season danglam tak a ni.

Old Trafford-ah Manchester United-in bul an ṭan ṭha a, second 30 lekah Anthony Martial-a'n Spurs defender Davinson Sanchez lakah penalty a hlawhchhuak. Bruno Fernandes rawn pen chhuakin Portuguese penalty specialist hian minute hnihna lekah goal hmahruai a khung.

Ole Gunnar Solskjaer-a'n player inhliam langsar a nei lo a, a duh thalin player a thlang thei a, goal an khung hma bawk avangin Man United dinhmun a ṭhaah a ngaih theih. Amaherawhchu an bul ṭan ṭhatna hian hun rei a daih lo a, an hma lam hun chu hmu lawk thiam se penalty aṭanga an goal khung pawh hi an lawm ngam lo hial ang.

Manchester United-in nikum August thla khan khawvel defender manto ber ni turin Harry Maguire chu Leicester City aṭangin pound maktaduai 80-in an lalut a, captain armband hial hreng tir mah se Spurs nen erawh United tlarhnung mualpho belhchhahna a ni.

Minute lina lekah Maguire hian a kawppui Eric Bailly a tauh per a, Ivorian defender hian tauh leh hramin Maguire hian goalkeeper pass tumin tauh let mah se a tauh na tawk lo. Luke Shaw leh Erik Lamela ten ball hi an inchuh a, Maguire hian a teammate Shaw tibuaiin a kuai a, hemi per hi Tanguy Ndombele-a'n si phurh sut nan a hmang.

Minute thum hnuah Son Heung-min-a'n Spurs hmahruaina goal a khung zui a, Harry Kane-a'n fing leh rang taka a pet thutte chu goal luh theihna chhan ni bawk mah se mawhphurtu lian ber chu Maguire a tih theih. English defender hian Kane a ti tlu a, Maguire hian ven zuina chang a hriat loh avangin Spurs number 10-in ball ṭha a pek chhuah theih phah a, Son-a finishing tawih tak thlen hma hian ball hi dan chah theih a ni.

Manchester United an insiamrem a, passing ṭha nei chhoin tun season an khelh ṭhat ṭum ber an tawng chho dawn niin a lang. Amaherawhchu minute 28-naah Anthony Martial-a'n ṭul lo takin amah nghawktu Lamela a khawih let a, Argentine midfielder a tluk uar thiam bawk avangin French forward hi a phu angin hnawhchhuah a ni. Martial hnawhchhuah a nih lai hian captain Maguire-a'n hnung lam aṭangin a thlir a, team hruaitu ber hi a inkiltawih hle.

Player 10-a khel United buaina belhchhah turin Eric Bailly-a'n a pass sual a, Harry Kane-a'n minute 30-naah goal thumna a khung. Spurs an khel ṭha zui a, Serge Aurier-a siam chu minute 27-naah Son-a'n a khung a, David de Gea-a'n a kap karah a chhuah. Goal lina a luh hian Luke Shaw a mualpho ve leh thung a, English left back hian a ven tur a thlang sual a, mawhphurtu a ni.

Ole Gunnar Solskjaer-a'n goal venhim duhin second half ṭantirhah Nemanja Matic leh Fernandes te la chhuakin Scott Mc Tominay leh Fred te a luhtir a, Portugese midfielder a la chhuak hi thutlukna mak takah a ngaih theih.

Norwegian manager subsitution siamin rah ṭha a thlen lo a, Spurs-in United tlarhnung awlsam takin an la ṭhiat tho. Minute 51-naah Pierre-Emile Hojbjerg pass chu Aurier-a'n ṭha zetin a pet goal a, Old Trafford-ah an chungnung hle. United midfielder Paul Pogba-a'n ṭul lo takin box chhungah Ben Davies a ti tlu a, minute 79-naah Harry Kane-a'n Spurs goal rukna a khung a, 6-1 in inkhel a tawp.

Manchester United-in goal ruk an chhuah a, team pumin khel ṭha lo bawk mah se mimal pawhin an tisual nasa hle. Chutihrualin Spurs hmachhawntu United tlarhnung De Gea (£22.5m), Wan Bissaka (£45m), Bailly (£30m), Maguire (£80m) leh Shaw (£30m) te man belhkhawm hian pound maktaduai 200 a pel a, team thar din theihna tham a tling.

Manchester United boss Ole Gunnar Solskjaer chuan, "Kan khingpuite an ṭha tih kan hria a, chutihrualin kan tihsual nasat vang a ni a, team ṭha laka chetsual chuan hremna kan tawk tur a ni reng a ni. Kan result hi zahthlak kan ti hle. Player zawng zawngin na an ti a, manager ka nih angin pawi ka ti a, ka hun tawn hrehawm ber a ni. Midang mawhpuh thei ka ni lo a, mawhphurtu ka ni," tiin chhuanlam a siam lo.

Norwegian manager Solskjaer chuan, "Kan hun tawn thlak danglam turin theihtawp kan chhuah dawn a, United nen 5-0 in kan chak lo tawh a, 6-1 pawhin kan tlawm tawh. Tun hma pawhin mualpho taka chak loh ṭum kan nei a, mahse kan thawk chhuak ṭhin," tiin an insiamṭhat tur thu a sawi.