Transfer hun a zo ta Cavani leh Telles a fel; A dang hi?

Nipui transfer bazar chu tukin zing dar 3:30 khan a tawp a, Manchester United-in Edison Cavani leh Alex Telles an lakluh chu he thuziah laia a lian zual a ni. Chutihrualin nimin tlai khan Arsenal-in thawm an nei thar a, Thomas Partey nen sawi zawm ṭhat leh an ni a, he thu i chhiar meuh chuan thil thleng langsar a awm thei tlat!

Kum 33 mi Cavani hian Old Trafford-a June 2022 thleng cham turin nimin khan contract a ziak a, kum khat dang pawhsei theih dan a awm bawk ang. Alex Telles pawhin nimin khan medical a nei fel a, United hian Brazilian left back manah hian Porto hnenah euro maktaduai 15 an pe ang a,  a chet ṭhat dan a zirin euro maktaduai hnih an pe tel ang. Kum 27 mi Telles hian kum li chhung atan contract a ziak a, kum khat dang pawhsei theih dan a awm.

Manchester United-in an lak tum ber Jadon Sancho erawh thuchiang a awm thei lo a, player neitu Borussia Dortmund erawhin tun nipuia an hralh loh tur thu an sawi nawn thung.

United hian Barcelona winger Ousmane Démbele pawh an dawr a, he thuziah lai hian inremna a awm thei chuang lo. Dembele hian English club hi a zawm a nih chuan Catalan club-in Memphis Depay an lalut dawn niin sawi a awm a, transfer tawp lam boruak vaw 'hot' tu chauh an ni thei bawk. Red Devils defender Chris Smalling pawhin season liam taa loan hmanga a khelhna Roma a let a duh a, amaehrawhchu English club leh Italian club-in he thuziah lai thleng hian inremna an nei thei lo.

Premier League hmahruaitu Everton keeper Jordan Pickford a chesual leh ṭhin a, Carlo Ancelotti-a'n keeper a melh. Toffees hi United third keeper Sergio Romero leh Spurs third keeper Paulo Gazzaniga nen an sawi zawm a, pakhat zawk an lalut a nih pawhin a mak lo ang.

Arsenal-in midfield lai an mamawh a, Jorginho nen sawi zawm ni mah se Italian midfielder hian Gunners a zawm dawn lo. Gunners hi nipui transfer ṭantirh aṭanga an sawi zawm tawh Thomas Partey nen boruak an nei thar leh a, London club hian Ghanaian midfielder release clause pound maktaduai 45.4 (€50m) an pe ngam tia sawi a awm a, thudik a ni em tih chu transfer tawp rualin a chiang ang.

Spanish club hian Partey hi a release clause a ngam an awm a nih chuan an chhuahtir tur thu an sawi tawh a, kum 27 mi midfielder hi Emirates Stadium mawi thei dinhmunah a ding.