A hun tea rah ṭhin Real & Benzema

Real Madrid-in Champions League last 16 lut tura an mamawh chu an match hnuhnung bera hnehna chan a ni a, an mamawh ang takin Borussia Monchengladbach chu 2-0 in an hneh. 

Karim Benzema chuan boruak sangah striker rin tlak a ni tih a pholang a, Real tan goal hnih a khung  - Gladbach tlawm mah se Shakhtar Donetsk chak zawh loh zar zoin last 16 an lut ve bawk. 

Group stage match hniha Real hneh ve vetu Shakhtar hian Inter Milan chu 0-0 in an inhnehtawkpui a, table-a pathumna niin Champions League an mangṭha. 

Ukrainian club hian Europea League chu round of 32 aṭangin an khel ṭan ang a, Inter Milan erawh table mawngphahah awmin European football an mangṭha a ṭul - Champions League group stage-a a zawna an tlak vawi thumna a ni. 

Gladbach-in last 16 lut turin draw result chiah an mamawh a, Real tan chak loh a thiang lo thung - Spanish champion fan-ten thin thaw dep depin inkhel an nghak a, last 16 luh loh hlauhthawnnain an khat. 

Mahse, minute kuanaah Real fan-ten hahdamna tur an nei ṭan a, mangan laia Real khai chhuak ṭhintu Karim Benzema chuan goal hmahruai a rawn khung - Lucas Vazquez siamsak a ni. 

Zinedine Zidane-a nauten inkhel an thunun chhunzawm a, German club-in kawng engkimah Real Madrid an khan lo - minute 31-naah Benzema bawk kan hmu nawn.

French striker hian Rodrygo siamsak chu an goal hnihna ni turin goal-ah a chantir a, Real fan-ten thlamuang takin inkhel an en thei tawh. Hun tawp thlengin goal dang a lut lo a, 2-0 in Real an chak.

Zidane-a meuhin a hna aṭanga a ban loh tur thu a lo sawi tawh a, hei hian Real dinhmun chiang takin a hrilhfiah - kar hmasa khan Shakhtar chu 2-0 in an ngam lo a, Zidane-a'n kawh rawn a hlawh ṭan.

Mahse, La Liga lamah pawh beisei phak lo team hian Sevilla chu league-ah 1-0 a hneh zuiin fan-te thinlung thawi dam hna an thawk ṭan a, Champions League group stage aṭanga tla tur chuan an ṭha hret tih pholangin hnehna an chang leh ta bawk. 

Real hi goal hnih aia tam zawk khung thei an ni a, an vanneih zan a ni lo. Croatian midfielder Luka Modric chu a goal khung pawmsak a ni lo a, Benzema leh Vazquez-ten woodwork an tih per bawk. 

Gladbach hian 36% chiah ball an chang a, target-ah vawi khat chiah shot an nei bawk - chak phu zawk Real-in hnehna an chang a, Europa League nena inhmeh ve lo Real chu Champions League-ah bawk kan hmuh chhunzawm dawn. 

Real-in an phu ang ngeiin hnehna an chang a, coach Zidane pawh a hlim hle. French manager chuan, "Kan thil tum ber chu hei hi a ni a, chu chu pakhatna nih a ni. 

"Inkhel hamrik a rik aṭanga a tawp thlengin kan khel ṭha em em a, kan game dik tak kan pho chhuak - tun season kan inkhel tawha kan game ṭha ber ni hialin ka ngai a ni," a ti. 

Real Madrid coach a nih hnua Champions League nomawi pali chawi thei coach chuan, "Kan hmabak a hautak poh leh ka naute hian an khel ṭha zel ni berin ka hria," a ti zui a, a naute chungah a lawm hle. 

Spanish champion hian Champions League inelna an tel tawhna 25-ah knockout round luh loh an la nei ngai lo a, 1996-97 season-a European football khel tura an tlin zawh loh hnuah season tinin Europe-ah knockout round an la lut ziah a ni. 

Nilaini zan Champions League inkhel boruak 'hot'-ah Real, Gladbach, Inter leh Shakhtar-ten last 16 luh theihna dan an nei vek a, boruak sanga talbuai lo ber Real-in an phu ang ngeiin an thiamna hmangin last 16 an lut. 

Inter-in Shakhtar lakah vawi 20 zet shot nei mah se an vanneih zan a ni lo a, Lautaro Martinez chuan minute sarihna lekah bar a tih per - minute 89-naah Alexis Sanchez-a ball tauh chu goalkeeper hmaa ding Romelu Lukaku chuan a lo dang bawk!

Lukaku hi offside position-ah erawh a awm a, hetihrual hian chak ngei ngei an mamawhna inkhel, hun tawp lama a lo dinna ngaihtuah hian inkhel a ngaihtuah tawk lo deuh niin a lang. 

Real Madrid inkhelh zawh hnuah Inter leh Shakhtar-te an la inkhel a, Gladbach an tlawm avangin a chak zawkin last 16 an lut thei - mahse, hun tawp thlengin team pahnihin goal an zawng hmu zo lo a, a tawpah Real ngam lotu German club hlimin 

an lam.