Mourinho a 'special' leh ṭhin

Tottenham leh Manchester United inhmachhawn hmain Jose Mourinho leh Ole Gunnar Solskjaer an inchhang a, Portuguese manager hi Chelsea manager Frank Lampard nen mual sirah an inhnial bawk.

Hei chauh hi a ni lo, Man United hian Mourinho hi an hnawl tawh. Heti chung hian Portuguese manager hi Man United coaching staff tana hmuh hrehawm turin khelmual sirah a khawsa lo a, hun tawp lamah phei chuan a ṭhutnaah 'cool' takin a ṭhu a, Lampard-a fuihna kha a takin a nunpui.

Inkhelh banah Mourinho chuan, "Manchester United ropuizia te, Old Trafford sulhnu te chhui chuan he stadium ropui taka club neitu 6-1 a hneh hi kan tan a hlu takzet a ni. 6-1 kha kan ngai pawimawh ber a ni lo a, kan khelh dan leh point thum kha kan mamawh zawk chu a ni.

"Kan tum chu match tina chak a ni a, ka player-te pawh vawi tam tak ka hrilh chu Old Trafford-ah chak a pawimawh tih hi a ni. Tun ṭumah pawh hian inhnehtawk pawh ni ila, result chhia chu a ni lo. Amaherawhchu chak duhna thinlung kan neih a ngai a, point sarih kan hmu a, table-a kan din-hmun hi a pawimawh," tiin a sawi.

Tottenham-in October 18 zanah West Ham an mikhual dawn. Manchester United erawh an hmabak a hautak dawn hle. Solskjaer-a hote hian Newcastle United, PSG, Chelsea, RB Leipzig leh Arsenal te an tum chho ang.