Reds an tlawm; Sevilla leh Shakhtar inhnehtawk

Liverpool-in kum 2007 hnua a vawi khat nana Europe-a final khelh an tumna kalkawng a harsa sawt tawh dawn - Reds hian Ningani zan khan Europa League semifinal first leg-ah Villarreal chu khualmualah 1-0 in an hneh lo.

Merseyside club tan final lut turin May 5-a Anfield-a semifinal second leg an khelh hunah goal hnih tal khung a, goal chhuah loh a ngai tawh dawn.

Semifinal inkhel dangah champion lai Sevilla chuan khualmualah 2-2 in Shaktar Donetsk an draw a, season thum chhung a zawna Europa League final lut turin Spanish club dinhmun a ṭha hle.

Reds an vanduai

Estadio El Madrigal-a inkhel-ah minute 90 a nih thlengin goal a lut lo a, team pahnih hi inhnehtawk tur angin an lang hman. Mahse, minute 92-naah substitute Adrian Lopez-a'n Reds tihsual nangchingin Villarreal tan goal a khung a, Liverpool tan si phurh sut turin hun a awm tawh lo.

Villarreal goal khungna kawngah Liverpool left back Alberto Moreno-a'n a tih tur a ti lo a, Adrian Lopez-a'n goal a khung theihna tura ball cross-tu Denis Suarez chu hmun awl a siamsak hnem hret a, minute 90 chhunga Reds tlarhnung thawhrimna chu engmah loah a chantir.

Liverpool tlarhmaah Jurgen Klopp-a'n rin loh takin Daniel Sturridge chu bench-ah a ṭhut tluantir a, tlarhmaa mal tlat Roberto Firmino-a'n goal ban a pet per bakah Joe Allen chuan a hun ṭha neih chu keeper zawnah ho lam takin a pet bawk.

Ningani zan inkhelah hian Villarreal fan-te chuan foot-ball chu game satliah a nih lohzia tilangin kum 1989 Hill^-sborough chhiatna avanga boral ta Liverpool fan 96-te hriatreng nan banner lian tak an keng a, '96 You'll Never Walk Alone' tih chu Spanish club khelmual mawitu a ni.

Klopp a beidawng lo

Liverpool boss Jurgen Klopp chuan, "Hun tawp hnaih lama kan goal chhuah avang khan ka lungawi lo takzet a, mah se first leg chauh a la ni tih hi kan hre reng tur a ni. Kan khelmual Anfield-ah ngei an rawn kal dawn a, kan buzawl a lenchilh kan hautak zia chu an hria ang. Final luh kan la inchuh dawn chauh a ni," tiin an la tlawm loh thu a sawi.

Villarreal manager Marce-lino chuan, "Hun tawp hnaih tawh lama goal kan khung avangin kan vannei takzet a ni. Result ṭha tak kan hlawh chhuak a, mah se zanin result ṭha hian eng chen nge min hruai theih dawn tih erawh kan la hre lo," tiin second leg match hautak an la hmachhawn dawn tih a hai lo.

Hmabak

Pathianni tlai dar 4:30-ah Liverpool-in league match khel turin Swansea City an lenchilh dawn. Premier Lea-gue-a pasarihna Liverpool hian palina Arsenal chu khelh khata khel tlem zawk chungin point kuain an phak lo mek a, match li chiah khelh tur a awm tawh avangin league aṭanga Champions League khelh ai chuan Europa League nomawi chawia Champions League khelh hi Reds tan kalkawng awlsam zawk niin a lang - Anfield-ah Villarreal an hmachhawn hunah an ṭang khawp ang.

Sevilla beiseina

Shakhtar Donetsk khel-muala inkhelah ṭan aṭanga minute 6-na lekah Sevilla-in Spanish forward Vitolo hmangin goal hmahruai khung mah se mualneitu team-in first half-ah Marlos leh Taras Stepanenko-te goal khung hmangin an thungrul ve nghal a, Ukrainian club-in first half-ah 2-1 in hma an hruai.

Second half-ah goal lut lawk lo mah se minute 82-naah Sevilla goal khungtu Vitolo bawk a langsar leh a, mikhual team tan penalty a hlawh chhuak. Penalty pet turin Kevin Gameiro a lo pen chhuak a, French striker hian zangkhai taka pet goal-in hun a tawp zui a, khualmuala goal hnih khungtu Sevilla tan final lut turin an khelmuala goal chhuah loh a tawk.

Sevilla boss Unai Emery chuan, "Team pahnih khan semifinal-a luh kan phu tih kan pholang a ni. Final lut tur a la chiang lo a, 50-50 chance kan la nei ve ve a ni. Final lut tur chuan kan inkhelh leh turah theihtawp kan chhuah ang," tiin an dinhmun a la him bik loh thu a sawi.

Shakhtar boss Mircea Lu-ces--cu a beidawng duh bik lo. Romanian manager chuan, "Goal hnih aia tam khung thei kan ni a, kan chhawr lo a ni. Final-a lut turin chance kan la nei a, khualmuala kan khelh hian kan khel ṭha ṭhin a ni," tiin Sevilla khelmuala an lenglut tur chu a zam lo.