NBA Playoffs Cavaliers hmachhawn tur Hawks

Nimin zing NBA Playoffs inkhelah Atlanta Hawks chuan Boston Celtics lakah 104-92 in hnehna an chang. Hawks hian series-ah 4-2 a hnehna changin Eastern Conference Semifinals an lut; May 3, Thawhlehni khian LeBron James a khelhna Cleveland Cavaliers nen an inhmachhawn ang.

TD Garden, Boston-a in-khelah mipui 18,624 an pung-khawm a, Celtics hi chak lo thei dinhmuna ding an nih vang leh Hawks lam hi semifinal lut thei an nih avang-in inkhel boruak a sang hle.

Inkhel ṭan phat aṭangin team pahnihin hnehna chan an tum tih a chiang a, Hawks lamin inkhel bul ṭan ṭha zawkin quarter hmasa pathumah an chungnung zawk vek. Celtics lamin quarter hnuhnung berah thapui thawhin point 33 zet nei thei mah se an insiam ṭha zo chuang lo.

Hawks tan Paul Millsap a che ṭha a, point 17 a score bakah rebounds vawi riat a la bawk. Ani bakah hian Al Horford leh Kent Bazemore te chuan point 15 ve ve neiin an thawhhlawk hle. Hawks hian Boston hi an ngam lo ṭhin hle a, kum 1958 hnuah kumin hi playoff series-a an hneh lehna hmasa ber a ni.

Chak lo mah se Celtics tan Isaiah Tho-mas chu Boston tana player langsar ber a ni a, point 25 a score bakah assists vawi 10 zet a nei bawk-in Jae Crowder-a'n point 15 a hlawhchhuak ve bawk.

Hawks in semifinal an luh hma hian Cavaliers, Golden State War-riors, San Antonio Spurs leh Oklahoma City Thunder te chu Conference Semifinals khel turin an lo tling tawh bawk a ni.