St.James Park-ah Pardew a kir dawn

Zanin dar 7:30-ah Newcastle United-in Crystal Palace an mi-khual dawn a, Magpies boss hlui Alan Pardew-a tan St.James Park-a chhuahsan hnua a club hlui a hma-chhawn lehna hmasa ber tur a ni ang.

Premier League
aṭanga tla thei dinhmuna ding Newcastle United-in match thum chiah khelh tur an neih tawh avangin chak loh a thiang tawh dawn lo.

Hetihrual hian Premier League-ah Crystal Palace an la him bik lo a, table-ah 16-na dinhmun an luah mek avangin manager Pardew chuan Premier League-ah an him chiang tih a hriat hma chu Palace-ah contract thar ziah a tum loh thu a sawi tawh a, Magpies laka an chak thei a nih erawh chuan him chiang tura beisei an ni.

Pardew chuan, "Rafael Beni-tez-a hnuaiah Newcastle United hian hma an sawn nasa em em a, Benitez hian game lian tak takah team a lo kaihhruai tawh ṭhin avangin a naute enkawl dan a hria a ni," tiin an khingpui manager a fak a, St. James Park-a chak a harsa dawn tih a pawm.

Newcastle United hian an match hnuhnung pathum aṭangin point nga an hlawh chhuak a, Manchester City leh Liverpool inhnehtawkpui thei team an nih avangin Spanish manager hnuaiah hma an sawn tih a chiang a, an hmabak match zawng zawng hi Premier League-a an him leh him loh hrilchiang thei thil a nih bawk avangin an ti mai mai lo ang.

Premier League match hnu-hnung paruk aṭanga teh erawh chuan team pahnih inthlauhna hi a tam lo hle. Newcastle-in an league match hnuhnung parukah vawi khat chiah hnehna an chang thei a, vawi hnih tlawmin vawi thum an khingpuite an inhnehtawkpui thung.

Crystal Palace-in an match hnuhnung parukah vawi khat chiah hnehna changin vawi hnih an tlawm a, vawi thum an khingpui an inhnehtawkpui thung. Mahse, Palace hi inelna ngaihhlut FA Cup final lut hlim an nih avangin an phur vanglai tak a ni a, Magpies hna a awlsam dawn bik lo.

Newcastle striker Papiss Cisse-a'n Premier League-a Crystal Palace a hmachhawn vawi thumah goal a la khung vek a, Palace tlarhnung tan ven uluk a ṭul khawp ang.

Palace-in Magpies a hma-chhawn hnuhnung pakuaa goal ruk leh assist vawi ruk nei Emmanuel Adebayor an kawl ve tho a, Arsenal striker hi a chet fuh ni chuan dan a harsa tih hi Magpies tlarhnung ten an hriat lawk ngei a rinawm.