Real chak zanah Barca chak zo lo

La Liga lamah pawh chanchin ngaihnawm a thlen belh zel a, champion lai Real Madrid-in 2-1 a Levante an hneh laiin Barcelona chuan an mikhual Sevilla chu 1-1 in an inhnehtawkpui.

Real Madrid tan Vinicius Junior leh Karim Benzema ten goal khat ve ve an khung a, Zinedine Zidane-a naute hian league match li an khelh aṭangin point 10 an nei ta. 

Barcelona-in match hnih a zawna hnehna an chan hnuin Sevilla an hneh thei lo a, an mikhual nen hian 1-1 in an inhnehtawk - Barca lama harh tharna chang Philippe Coutinho chuan goal a khung. 

Ronald Koeman-a enkawl team tan Lionel Messi-a'n a match hmasa bera penalty aṭanga goal a khung bak a la khung leh lo a, Argentine forward chet ṭhat leh ṭhat loh hian Barca hma hun thui takin a hril. 

Levante mualah goal khung turin Real-in hun an mamawh rei lo a, rawlthar duhawm Vinícius Júnior chuan minute 16-na lekah he inkhela goal hmahruai hi a khung. 

Kum 20 mi forward hian Real Valladolid laka 1-0 a hnehna an chan ṭumin inkhela goal awmchhun a lo khung tawh a, La Liga match a a zawna goal a khung hmasak ber a tawng. 

Brazil international Vinicius hian goal dang khung theihna remchang pawh a nei a, mahse Benzema cross aṭanga a chance ṭha neih hi a chhawr thei lo thung. 

Vinicius hian season hmasa khan inelna hrang hrangah match 38 khelin goal nga a khung a, tun season-ah match thum a khelh aṭanga goal hnih a khung tawh avangin season hmasa ai chuan goal a khung tam zawk dawn niin a lang. 

Season hmasaa Real champion theih chhan lian tak chu Karim Benzema a ni a, French striker hian tun season a a goal hmasa ber ni turin hun pek belh minute nganaah an goal hnihna a khung. 

Kum 32 mi striker hian second half-ah post a tih per bawk a, a kum tam ve deuh tawh mah se level sanga inkhel turin theihna a la nei reng tih a pholang - season hmasa khan inelna hrang hrangah match 48 khelin goal 27 a khung a, assist vawi 11 a nei bawk. 

Real captain Sergio Ramos chuan goal a khung niin inngai mah se Luka Modric freekick aṭanga ball kal tauh tur hian a lo foul hman a, Spanish defender goal khung hi pawm a ni lo. 

Zinedine Zidane-a nauten hnehna an chan theih nan goalkeeper Thibaut Courtois chu fak phu a ni a, Belgian keeper hian 1-0 a hma an hruai laiin Levante tan Gonzalo Melero goal khung ngei tur nia ngaih chu a line aṭanga tlan chhuakin a dansak. 

Ronald Koeman enkawlna hnuaia an match hmasa pahnihah Barcelona-in hnehna an chang ve ve a, goal sarih ngawt khungin an lamah a lut miah lo bawk - Sevilla lakah chak zawk tura beisei an ni. 

Mahse, Sevilla tan season hmasa tawp lama che fuh Luuk de Jong chuan minute riatna lekah goal hmahruai a khung a, Barca an hawihai hle - mahse Sevilla hlim chhung erawh a rei lo. 

De Jong goal khung aṭanga minute hnihna lekah Coutinho chuan chhangletin goal a khung ve lehnghal a, Brazilian midfielder hian a man phu ang ngeiin a khel chhuak ṭan. 

Season hmasa lama Bayern Munich a loan a khel midfielder hian tun season-ah Barca tan match thum khel tawhin goal khat a khung a, assist vawi hnih a nei tawh bawk. 

Barcelona chanchin ziah chuan Lionel Messi-a'n goal a khung thu ziah tel a ngai ṭhin a, Barca match hnuhnung pathumah erawh penalty aṭanga a chhuih luh bak goal chhuan tur a nei lo. 

Argentine forward hian Sevilla lakah pawh chance nei ngei mah se a hun ṭha neih a chhawr thei lo a, Barca fan-ten an thiampuipa goal khung lai hi hmuh an châk leh tawh ang. 

Season hmasaa beisei phak lo Antoine Griezmann pawh a la insiam-ṭhat chhunzawm lo zel a, a chance neih goal-ah a chantir thei lo - season hmasa khan inelna hrang hrangah match 48 khelin goal 15 a khung a, tun season-ah match thum khel tawhin goal khung a la nei lo. 

Sevilla defender Ronald Araujo-a'n 'own goal' a nei teuh hle a, ball cross a dan per chuan bar a tih per! Europa League champion tan hian Jules Kounde chuan chance ṭha vawi hnih ngawt a khawh ral a, Barca duh loh hnu Ivan Rakitic chuan Sevilla tan khelmualah minute 78 chhung hun a hmang bawk.