La LigaLa Liga Nomawi chawi tur tan chetsual a thiang lo

La Liga boruak chu "A che che sih hlawkah" a ni mek. Barcelona tan La Liga nomawi chawi turin inkhelh hmabak pathum an la neihah chak vek a tawk. Mahse, Luis Enrique naute hi an che sual hlauh a nih chuan Atletico Madrid leh Real Madrid tan nomawi chawi theihna kawng a inhawng ang.

League match 35 khelh tawh aṭangin Barca hian point 82 an hmu tawh a, pahnihna Atletico nen an danglamna chu head-to-head chauh a ni. Pathumna Real Madrid pawh point khat chauhin an hniam.

Zanin hian Spanish club lian pathum hi an inlan vek dawn a, dar 7:30-ah Real Madrid chu Real Sociedad khelmualah an leng lut ang a; dar 9:45-ah Atletico chuan Rayo Vallecano mikhualin zanlai dar 12:00-ah Barca chu Real Betis nen an inhmachhawn dawn bawk.

Goal khung thiam

Barcelona hi Champions League quarterfinal-a Atletico an hneh loh hnuah league-ah Valencia 2-1 a an hneh lo zui leh a, mahse tunah erawh an insiamṭha leh tawh chiang hle. Deportivo La Coruna 8-0 a an sawp hnuin Sporting Gijon 6-0 in an sawp leh tawh a ni.

Barca hian tun season league match-ah goal 102 zet khung tawhin anni aia khingpuite lama chhuih lut tam an awm lo. Striker Luis Suarez chuan thawhhlawk berin Liverpool forward hlui hian league goal 34 bakah inelna hrang hrangah goal 53 khung tawhin khawvela hmatawng hlauhawm ber pawl a ni mek.

Ronaldo chiang lo

Cristiano Ronaldo-a'n hliam vangin Real Madrid match hnuhnung pahnih a khel thei tawh lo a, Champions Legua semifinal first leg-a Manchester City nen an inkhelh ṭumin striker Karim Benzema pawh hliam vang thoin lakchhuah a ngai. Real tlarhmaa mi pawi-mawh pahnihte hian Real Sociedad an hmachhawn thei dawn em tih a chiang lo.

Real Madrid chuan Ben-zema hi a malpui hnung lam a na tih an sawi chiang tawh a, mahse a chawlh hun tur an sawi lang tel lo thung. Thuchhuan siamin Real chuan, "Benzema hliam hi University Hospital Sanitas La Moraleja-ah endik a ni a, a malpuii vei lamah hliam a tuar," an ti.

Kartawp inkhelah hian Ro-nal-do leh Benzema te hi chhawr thei lo mah se Real chuan karleha Manchester City an mikhual hunah chuan an player pawimawh pahnihte hi an dam ngei an beisei thu an sawi lang bawk.

Luis a inrintawk

Atletico Madrid left back Felipe Luis chuan nomawi chawi theih a inbeisei thu leh inrintawkna an neih san thu a sawi chhuak.

Saul Niguez goal ropui hmangin Atletico hian German champion Bayern Munich chu Champions League semifinal first leg-ah an hneh a, zanina Rayo Vallecano nen Madrid derby an khelh turah pawh inrintawkna an nei sang hi a mak lo.

Brazil international Luiz chuan, "Bayern nena kan inkhelh kha football ka khelh ve tawh chinah chuan a harsa berte zinga mi a ni a, kan rilru leh taksa pawh a hah hle. Tunah derby khel turin kan inpuahchah leh nghal a ni a, puitlin a ngai dawn hle. Rayo hi tlahniam thei an la nih avangin an khelh a har dawn a, fimkhur takin kan hmachhawn ang," tiin a sawi.