Bayern tan league nomawi a hnai
Champions League semifinal first leg-ah Bayern Munich chu Atletico Madrid lakah 1-0 in chak lo hlim mah se zanin hian Bundesliga nomawi chawi theihna hun an nei dawn.
Pep Guardiola naute hian zan dar 7:00 hian Allianz Arena-ah Borussia Monchengladbach an lo mikhual dawn a, hnehna an chang a nih chuan German football history thar siamin a zawna Bundeliga nomawi vawi li chawi thei hmasa ber an ni ang.
Bayern hi Dortmund lakah point sarihin an sang mek a, Monchengladbach hi an hneh a nih chuan inkhelh hmabak pahnih an la neihah lehpelh theih an ni tawh dawn lo a ni.
Vicente Calderon-a Atletico an hneh loh ṭum khan star player Thomas Muller chu Spanish manager hian bench-ah a ṭhut tir a, hun tawp lam minute 20 awm tawhah a tlan luh tir chauh. Muller-a'n inkhel bul a ṭan loh chhan hi Bayern fan-te chuan an manager hnenah an zawt nasa hle. German internatinal hian zanin chuan inkhel bul a ṭan tawh ngeiin a rinawm a, ani bakah hian Jerome Boateng pawh a ṭhâl na a dam tawh bawk.
Bayern hian an league match hnuhnung 10-ah hnehna an chang vek a, goal 29 khungin an lamah goal hnih chiah a lut nghe nghe. Mahse, Bayern hna hi a awlsam dawn lo. Season chanve hmalam khan league-ah vawi khat chiah chak loh an nei a, an hneh loh chu zanina an mikhual tur Monchengladbach hi an ni.
Guardiola naute hian Mon-chengladbach lakah hian result an nei ṭha hleithei lo a, an intawn hnuhnung pathumah vawi khat mah hnehna an chang lo. Vawi hnih chu a chak lo zawkah
ṭangin ṭum khat an inhnehtawk thung. Hei vang hian Bayern hi champion chiangsaa dah ngawt theih an ni rih bik lo ang.
Season thara Manchester City manager tur Guardiola chuan, "Ka naute hnena ka sawi fo chu Dortmund hian an inkhelh hmabak zawngah hian hnehna an chang tawhin a rinawm. Chuvangin nomawi chawi tur chuan keimahni ngeiin hnehna kan chan a ṭul. Zanin hian inkhel awlsam beisei chi a ni dawn lo a, Champions League khel hlim kan nih bawk avangin fimkhur a ngai hle ang," tiin a la ṭawng pawr rih lo hle.
Boateng chuangchang sawi chhunzawmin, "Thla li chhung vel hliam vangin a inkhelh theih loh hnuah tun hnaiah a lo kir leh chauh a ni a, inkhel bul ṭan tur zingah a tel dawn em tih ka sawi thei lo. Engpawh nise a hliam a dam tawh avangin a lawmawm hle," tiin a sawi.
Dortmund ve thung
Borussia Dortmund hi Europa League aṭangin Liverpool hneh loin an tla tawh a, Bundesliga-ah pawh beisei an nei chau tawh hle. Zanin dar 7:00 vek hian Champions League quarterfinal a Real Madrid hneh lotu Wolfsburg an lo mikhual dawn.
Dortmund hian tun season league match bikah ṭum 31 inkhelh tawh aṭangin vawi 23 hnehna changin point 74 an hmu thei. An club chanchinah match 31 an khelh tawh aṭanga an record neih ṭhat ber ṭum a la ni hial. Mahse, Bayern an awm avangin Thomas Tuchel-a hnathawh hi an lansarh tur angin an langsar tawk lo.
Star player Pierre-Emerick Aubameyang leh Ilkay Gundogan te chu hliam vangin buai deuh mah se Ningani khan training an zawm leh tawh a, zanin hian an inlan theih beisei a ni.