Kan khaw tualah Federation Cup Aizawl FC Vs Bengaluru FC

Mizoramin Santosh Trohpy Qualifier a thleng tawh a, I League match riat ngawt Aizawlah khelh a ni tawh bawk. Vawiin hian Mizoram chhungah a vawi khat nan Federation Cup khelh a ni dawn a, hun bik a nih avangin tualchhung football ngaina hranpa lo tan pawh en ngei chi a ni.

MPL champion Aizawl FC leh I League champion Bengaluru FC inkhelh hun hi tlai dar 3:00 a ni a, inkhelhna hmun tur hi RG Stadium, Mualpui a ni. Inkhel en man hi Rs 50 aṭanga inṭanin Rs 500 man thleng a awm a, ticket hi TṬ Enterprise, Bazar Bungkawn leh Din Din Pharmacy, Khatlaah a lei theih.

1-na Vs 8-na

Federation Cup fixture hi I League khelh zawh tak dinhmun aṭanga siam a ni a, kumin inelna hi team pariat chiah tana duan a nih avangin pakuana DSK Shivajians tan hmun a awm lo.

Match 16 aṭangin Bengaluru FC-in point 32 an hlawh chhuak a, an hmachhawn tur Aizawl FC hian champion team point hmuh zat chanve hmuin pariatnaah an awm.

Danglamna Goal 1

Aizawl FC hian January 16, 2016 khan RG Stadium-a I League an khelh hmasak ber ṭumin Bengaluru FC an hmachhawn a, defender Osano Curtis goal hmangin Blues 1-0 in an chak

An intawn hmasak ṭuma Reading leh Wimbledon defen-der hlui Curtis goal khungna tura freekick pettu Keegan Pereira chu hrem vangin a rawn zin ve lo. Lengpui tlangval Lalchhuan-mawia'n starting eleven a chang chiangah a ngaih theih.

February 28 khan Sree Kan-teerava Stadium-ah Bengaluru FC-in Aizawl FC an mikhual a, CK Vineeth goal hmangin Blues an chak hram. Inkhela goal awmchhun hi replay
aṭanga a landan chuan offside a ni.

RG Stadium-ah Collins

Bengaluru FC-in an rawn zin hmasak ṭumin foreigner pa-thum chiah an kawl a, defence laiah Curtis Osano leh John Johnson awmin striker-ah Kim Song-Yong an nei bawk.

Blues midfielder Josh Walker chu season ṭan hma-in a inhliam a, English midfielder thlak nana an lakluh chu Irish midfielder Michael Collins a ni.

Republic of Ireland under 21 tan pawha khel tawh Collins hian Mizo midfielder Malsawmzuala chu defensive midfield-ah luahlan nghal mah se beisei a pha lo. Tunah erawh Huddersfield Town, Scunthorpe United, Wimbledon leh Oxford United te midfielder hlui hi striker hnungah dah a ni tawh a, team chakna kawngah player pawimawh a ni.

Mizote tana hriat nuam chu Sawmtea'n Bengaluru mid-field-ah hmun pawimawh a chang. Chaltlang rawlthar hi FPAI Young Player of the Year nominee-ah telh a ni.

En bik tlak

Champhai keeper Lal-thuam--mawia tun hnaiah a khelh ṭhat loh avangin Amrinder Singh chuan khelhna hmun a luah lan a, Pune Academy chhuak keeper hi tun season I League best keeper a ni.

Blues midfielder Eugene-son Lyngdoh chu season hnih chhung a zawnin I League best midfielder-ah thlan a ni a, field sir lama winger tlan chak zet Udanta Singh chu FPAI best young player a thlan a ni. Tlarhnung lamah English defender palian John Johnson chu I League best defender a ni.

Tun season-ah captain Sunil Chhetri-a'n mimal lawmman dawng lo mah se India captain hi en bik tlak a la ni reng. Khelhna hmun an chang a nih chuan Beikhokhei Beingaichho leh Daniel Lalhlimpuia te hi inkhel tidanglam thei a ni.

Aizawl lam

Shillong Lajong-in I League aṭanga an relegate kumah Federation Cup-ah final an lut a, 2009-10 season khan East Bengal an hneh lo. Season liam ta khan Dempo chu I League aṭangin an relegate a, Federation Cup-ah erawh final lutin Bengaluru FC an hneh lo.

Tun season hi I League team intluk tlan ber ṭum a ni a, Aizawl FC tan Nilaini zana AFC Cup match pawimawh tak khel Bengaluru FC hi hneh theih a ni. MPL champion player-te an dam ṭha a, tuna Mizo club mamawh chu mipui ṭanpuina a ni.

Relegate lo?

Aizawl FC coach Jahar Das chuan, "I League aṭangin kan relegate lo a, kan hnuaiah DSK Shivajians an awm avangin kan tlaah ka ngai thei lo. AIFF-ah kan lungawi loh thu hi kan thlen tawh a, an ngaituah zui ang. I League kan khelh zel a nih pawhin a mak lo ang, ka ngaihdan chuan Aizawl FC-in India league sang ber an khelh zelna chance hi 70% a ni," tiin relegate-ah a inngai duh lo.

Federation Cup chungchang sawi zuiin Bengali coach chuan, "Bengaluru FC-in AFC Cup an khel zo chiah a, ngai an la awh lo ang. Chubakah cham-pion zo hlim an nih avangin pressure an ngah zawk a, kan hneh thei ang," tiin result ṭha hlawhchhuah a inbeisei hle.

Bengaluru FC coach Ashley Westwood chuan, "Aizawl FC hi team ṭha tak an ni a, kan
ṭhat dan bera kan khel lo a nih chuan kan hmabak chu chak loh a ni," tiin fimkhur a ngaih thu a sawi ve bawk.

Hero Federation Cup 2016

Fixtures

Quarterfinal - First Leg

April 30, Inrinni

Aizawl FC Vs Bengaluru FC

May 2, Thawhṭanni

Salgaocar FC Vs Mohun Bagan AC

May 1, Pathianni

Shillong Lajong FC Vs East Bengal

Mumbai FC Vs Sporting Goa

Quarterfinal - Second Leg

May 3, Thawhlehni

Bengaluru FC Vs Aizawl FC

May 5, Ningani

Mohun Bagan Vs Salgaocar FC

May 4, Nilaini

East Bengal Vs Shillong Lajong FC

Sporting Goa Vs Mumbai FC

Semifinal - First Leg

May 7, Inrinni

Aizawl FC/Bengaluru Vs Sporting Goa/Mumbai FC

May 8, Pathianni

Salgaocar/Bagan Vs East Bengal/Lajong

Semifinal - Second Leg

May 15, Pathianni

Sporting Goa/Mumbai FC Vs Aizawl FC/Bengaluru

May 14, Inrinni

East Bengal/Lajong Vs Salgaocar/Bagan

Final hi May 21, Inrinniah khelh tur a ni.